Қазақстан Президенті Қасым-Жомарт Тоқаев Мұхтар Әуезов атындағы Оңтүстік Қазақстан зерттеу университетіне ұлттық мәртебе беру туралы шешім қабылдады. Мемлекет басшысы бұл туралы Астанада өткен Стратегиялық серіктестердің III халықаралық форумында мәлімдеді. Жаңа мәртебе жоғары оқу орнының ғылыми-зерттеу әлеуетін арттырып, Шымкент қаласының білім беру орталығы ретіндегі маңызын күшейтуге бағытталған, деп хабарлайды SteppeNews.kz.
Президенттің айтуынша, Мұхтар Әуезов атындағы университет – оңтүстік өңірдегі ең ірі жоғары оқу орындарының бірі. Шымкенттегі әрбір бесінші студент осы білім ордасында оқиды.
Мемлекет басшысы ұлттық мәртебе университеттің өзіне ғана емес, оған жетекшілік ететін Ғылым және жоғары білім министрлігіне де қосымша жауапкершілік жүктейтінін атап өтті.
«Халқымыздың заңғар жазушысы Мұхтар Әуезов атындағы Оңтүстік Қазақстан университетіне ұлттық мәртебе беру туралы шешім қабылдадым. Әуезов университеті – аймақтағы ең ірі жоғары оқу орны. Шаһардағы әрбір бесінші студент осы университетте оқиды. Ұлттық мәртебе білім ордасымен қатар құзырлы министрлікке де зор жауапкершілік жүктейді. Сондықтан Мұхтар Әуезов атындағы Оңтүстік Қазақстан университеті сапалы білімнің, терең ғылымның ошағы, аймақтың зияткерлік орталығы болуға тиіс», – деді Қасым-Жомарт Тоқаев.
Университеттің ғылыми әлеуеті артады
Ұлттық мәртебе университеттің білім беру және ғылыми-зерттеу бағыттарын дамытуға жаңа мүмкіндіктер ашады. Атап айтқанда, ғылыми әзірлемелерді өндіріске енгізу, халықаралық академиялық байланыстарды кеңейту және өңір экономикасына қажетті мамандар даярлау жұмыстарына басымдық беріледі.
Бүгінде Мұхтар Әуезов атындағы Оңтүстік Қазақстан зерттеу университеті өңірдегі жетекші жоғары оқу орындарының бірі саналады. Оқу орнында қалыптасқан ғылыми мектептер мен көпжылдық тәжірибе оның оңтүстік өңірдің ғылыми-білім беру жүйесіндегі орнын айқындайды.
Сонымен қатар Шымкент қаласында Аризона штаты университетінің (Arizona State University) білім беру бағдарламасы жүзеге асырылып жатыр. Бұл халықаралық академиялық ынтымақтастықты дамытуға бағытталған бастамалардың бірі.
Шымкенттің зияткерлік орталық ретіндегі әлеуеті
Президенттің шешімі университеттің зерттеу қызметін күшейтуге, ғылым мен өндіріс арасындағы байланысты дамытуға және халықаралық ғылыми жобаларды кеңейтуге негіз болады.
Бұл бағыттар өңірде жаңа зерттеу бастамаларын іске асыруға, ғылыми-технологиялық әлеуетті арттыруға және еңбек нарығына қажетті бәсекеге қабілетті мамандар даярлауға мүмкіндік береді.
Осылайша, Мұхтар Әуезов атындағы Оңтүстік Қазақстан зерттеу университетіне ұлттық мәртебе беру туралы шешім жоғары оқу орнының дамуындағы маңызды кезең болмақ. Сонымен бірге бұл қадам Шымкент қаласының және тұтастай оңтүстік өңірдің ғылыми-білім беру әлеуетін нығайтуға бағытталған.
Келесі материал: Қазақстанда Орталық Азиядағы алғашқы аграрлық ғылыми орталық құрылады
