Алматыда Төле би көшесін ұзарту жобасы аясында жүргізілетін құрылыс-монтаж жұмыстарына байланысты көшенің бір бөлігінде көлік қозғалысына уақытша шектеу енгізіледі, деп хабарлайды SteppeNews.kz Алматы қаласы әкімдігінің баспасөз қызметіне сілтеме жасап.
Әкімдік мәліметінше, 14 шілдеден 25 тамызға дейін Төле би көшесінің Әшімов көшесінен Алатау көшесіне дейінгі аралығында барлық көлік түрлерінің қозғалысы толықтай тоқтатылады.
Осы кезеңде жүргізушілерге аталған учаскені Сәбденов көшесі арқылы айналып өту ұсынылады.
Қауіпсіздікті қамтамасыз ету мақсатында жолдың жабылатын бөлігінде арнайы ескерту белгілері орнатылады. Қала билігі тұрғындар мен жүргізушілерден жол жүру бағытын алдын ала жоспарлап, уақытша енгізілген өзгерістерді ескеруді сұрайды.
Жол қозғалысына қатысты өзекті ақпаратты @AlmatyJoly Telegram арнасынан, Алматы қаласы әкімдігінің ресми әлеуметтік желідегі парақшаларынан, сондай-ақ 2GIS және «Яндекс Карталар» сервистерінен білуге болады.