Астанада мерейтойлық Astana Media Week 2026 медиа-апталығы аясында «Тұмар» және «Үркер» ұлттық сыйлықтарының жеңімпаздарын марапаттау салтанаты өтті. Бұл жылы аталған беделді марапаттар алғаш рет Qazaqstan Media Awards бірыңғай бренді астында біріктірілді, деп хабарлайды SteppeNews.kz.
Салтанатты шараға отандық медиаиндустрия өкілдері, журналистер, редакторлар, тележүргізушілер және еліміздің түкпір-түкпірінен келген шығармашылық ұжымдар жиналды.
Жиналыста Қазақстан Республикасының Мәдениет және ақпарат министрі Арман Қырықбаев құттықтау сөз сөйледі. Ол технологиялар мен жасанды интеллекттің қарқынды дамуына қарамастан, кәсіби журналистика мен өз ісіне адал мамандарға деген сұраныс әрдайым жоғары болып қала беретінін атап өтті.
«Мемлекет басшысы журналистиканы дамытуға ерекше көңіл бөліп, салаға барлық жағынан, оның ішінде әлеуметтік және моральдық тұрғыдан жан-жақты қолдау көрсетеді. Мемлекеттің медиа саласына қатысты саясаты болашақта да өзгеріссіз қалады деп сенемін», — деп атап өтті Арман Қырықбаев.
Марапаттау рәсіміне Қазақстан Республикасы Құрылтайының депутаттары Сергеи Пономарев, Үнзила Шапақ, Жанарбек Әшімжан, Қазақстан Халық кеңесінің мүшесі Нұртөре Жүсіп, Q.A бас директоры Дмитрий Мун, Ұлттық киноны қолдау орталығының төрағасы Құрманбек Жұмағали, ҚР Президенті жанындағы Орталық коммуникациялар қызметінің директоры Асқар Умаров, сондай-ақ мемлекеттік органдар мен медиа саласының өкілдері қатысты.
Биыл 12 номинация бойынша өтінім қабылданып, конкурсқа 600-ден астам журналист қатысты. Байқауға телевизиялық, мерзімді баспасөз, радио және интернет-журналистика саласындағы дайын жұмыстар ұсынылды.
Марапаттау тарихында алғаш рет медиа саладағы жаңа технологиялар мен форматтардың дамуын көрсететін «Журналистиканың болашағы: жасанды интеллект саласындағы үздік жоба» арнайы номинациясы енгізілді.
Жеңімпаздарды белгілі журналистерден, медиаиндустрия өкілдерінен және салалық сарапшылардан құралған тәуелсіз қазылар алқасы анықтады.
«Тұмар» және «Үркер» ұлттық сыйлықтары 2017 жылы Қазақстан Республикасы Мәдениет және ақпарат министрлігінің бастамасымен тағайындалған болатын. «Тұмар» сыйлығы отандық телевизияны қолдауға және дамытуға бағытталса, «Үркер» баспа, радио және интернет-журналистикадағы жетістіктерді атап өтеді.
2026 жылғы «Тұмар» және «Үркер» ұлттық сыйлықтарының жеңімпаздары:
«Тұмар – 2026» ұлттық телевизиялық сыйлығы:
-
Үздік тележүргізуші – Вероника Вишневская, «Евразия» бірінші арнасы;
-
Үздік деректі жоба – 24KZ, «4739»;
-
Үздік телевизиялық материал – Qazaqstan, «Қарқынды құрылыс»;
-
Үздік әлеуметтік жоба – Jibek Joly, «Правда в детали»;
-
Үздік телесериал – Астана TV, «Ауыл бапкері»;
-
Үздік ақпараттық-сараптамалық бағдарлама – 7-арна, «Новости».
«Үркер – 2026» ұлттық сыйлығы:
-
Жылдың үздік журналисі – Жанар Сердалина;
-
Үздік радиожоба – Қазақ радиосы, «Ойтұма» бағдарламасы;
-
Журналистиканың болашағы: жасанды интеллект саласындағы үздік жоба – Altainews Media Centre, «AI-ЖАН»;
-
Үздік медиажоба – Tengrinews, Tengri TV;
-
Жылдың үздік материалы – Мирамгүл Рахатқызы, «Ақтөбе» газеті, «Жасанды интеллект: адамзат жаңа дәуірге аяқ басты»;
-
Үздік сараптамалық материал – Лаура Түсіпбекова, «Казахстанская правда» газеті, «Моя ДНК — наше богатство».
Qazaqstan Media Awards – 2026 арнайы жүлделері:
-
Президенттің Телерадиокешені – 30 жылдығына орай;
-
Информбюро – 30 жылдығына орай.