Ташкентте кітап пен оқуды қала ортасының ажырамас бөлігіне айналдыру жоспарланып отыр. Бұл туралы қала әкімі Шавкат Умурзаков Өзбекстан ұлттық ақпарат агенттігіне берген сұхбатында мәлімдеді деп хабарлайды SteppeNews.kz gazeta.uz ақпараттық сайтына сілтеме жасап.
Жоспарға сәйкес, елордадағы барлық 585 махаллада кезең-кезеңімен кітап оқуға арналған бұрыштар ашылады. Сонымен қатар Ташкенттің 12 ауданында заманауи интерактивті кітапханалар салынады. Ірі жаңа сауда орталықтарында кітап дүкендерін ашу талабы да енгізілмек.
Бұл шаралар Өзбекстан президентінің 27 шілдедегі «2026–2027 жылдары Ташкент қаласын әлеуметтік-экономикалық дамыту жөніндегі қосымша шаралар туралы» қаулысында қарастырылған.
Шавкат Умурзаковтың айтуынша, құжатта кітап пен оқу қалалық ортаның бір бөлігі ретінде қарастырылады.
«Адам үйінен шығып, өз махалласында кітап оқуға арналған бұрышты көреді. Мұндай бұрыштар енді елорданың барлық 585 махалласында кезең-кезеңімен ұйымдастырылады», – деді қала әкімі.
Ташкенттің 12 ауданының әрқайсысында үлкен заманауи интерактивті кітапхана салу жоспарланған. Әкімнің айтуынша, олар үшін орындар да анықталған.
Бұл нысандар тек кітап сақтайтын ғимарат ретінде қарастырылмайды. Жаңа кітапханалар тұрғындар ғылыми және рухани қажеттіліктерін өтей алатын қоғамдық кеңістікке айналуы тиіс.
Сауда орталықтарында кітап дүкендері мен кітапханалар ашылады
Ташкенттегі жаңа ірі сауда орталықтарына кітап дүкенін ашу бойынша міндетті талап енгізу жоспарланып отыр. Дүкеннің аумағы сауда орталығының көлеміне сәйкес болуы тиіс.
Бұдан бөлек, елорданың туристік және адам көп жүретін көшелерінде жеңілдетілген шарттармен кітап дүкендері мен кітапханалар ашу көзделген.
Қала әкімінің айтуынша, билік кітапханаларды қаланың ең тартымды әрі жайлы қоғамдық кеңістіктерінің біріне айналдыруды мақсат етіп отыр.
«Адам қай жерде болса да – махаллада, ауданда, көшеде немесе сауда орталығында – кітап оған жақын болуы керек. Біз “15 минуттық қала” дегенде осыны да меңзейміз», – деді Шавкат Умурзаков.
«Көк күмбездерде» «Кітап көшесі» пайда болады
Ташкент әкімінің айтуынша, негізгі жобалардың бірі – «Көк күмбездер» деп аталатын аумақты кітап оқу мәдениетіне арналған қоғамдық кеңістікке айналдыру.
Тарихи тұрғыдан бұл жер кітап саудасының маңызды орталықтарының бірі болған. Қазір билік оның осы ерекшелігін қайта жандандыруды жоспарлап отыр.
Шілде айында кешеннің тарихи келбетін толық қалпына келтіру жоспары жарияланған болатын. Әкімнің айтуынша, жоба оқырмандар мен қоғам өкілдерінің пікірін ескере отырып жүзеге асырылады.
Президенттің 27 шілдедегі қаулысына сәйкес, Яккасарай ауданындағы Шарофа Рашидов даңғылында орналасқан «Көк күмбездер» скверінің аумағында тәулік бойы жұмыс істейтін «Кітап көшесі» ұйымдастырылады.
Жоба аясында аумақты абаттандыру, кәсіпкерлердің жұмысын ретке келтіру және ашық алаңдарда түрлі іс-шаралар өткізу қарастырылған. Оны 2026 жылғы желтоқсанға дейін іске асыру жоспарланып отыр.
Сонымен қатар Ташкентте оқуды насихаттауға бағытталған «Үздік оқырман» қалалық байқауын өткізу жоспарлануда.
ЦУМ маңындағы кітап қатарлары Ташкент тұрғындарының бірнеше буынына жақсы таныс. Чинара ағаштарының көлеңкесіндегі кітап дүңгіршектері қаладағы кітапсүйер қауым үшін ерекше орындардың біріне айналған. Енді бұл аумақты жаңғыртып, кітап оқу мәдениетінің заманауи орталығына айналдыру жоспарланып отыр.