Алакөл өңірі ежелден өзінің көркем табиғатымен, көл суының емдік қасиетімен және бай биоалуантүрлілігімен ерекшеленеді. Бұл аймақ – көптеген қоныс аударатын құстардың мекені әрі талай ақын-жазушының шығармасына арқау болған қасиетті өлке. Осындай табиғи мұраны келер ұрпаққа аман жеткізу – баршаға ортақ міндет. Бұл туралы SteppeNews.kz Қазақстан Республикасы Экология және табиғи ресурстар министрлігіне сілтеме жасап хабарлайды.
Алакөл мемлекеттік табиғи қорығы 1998 жылы Тентек өзенінің атырауындағы жануарлар мен өсімдіктер дүниесін, сондай-ақ Алакөлдегі Аралтөбе аралдарын мекендейтін көне дәуір шағаласының бірегей популяциясын қорғау мақсатында құрылған.
Қорықтың жалпы аумағы 65 672 гектарды алып жатыр. Оның 17 877 гектары Жетісу облысының Алакөл ауданында орналасса, қалған 47 795 гектары Абай облысының Үржар және Мақаншы аудандарына тиесілі.
Бұл өңір Орталық Азия – Үндістан бағытындағы құстардың негізгі көші-қон жолдарының бірі саналады. Осыған байланысты Алакөл–Сасықкөл көлдер жүйесі 2009 жылдың 25 қарашасында Рамсар конвенциясының халықаралық маңызы бар сулы-батпақты алқаптар тізіміне енгізілді. Ал 2013 жылдың 29 мамырында Алакөл қорығы ЮНЕСКО-ның биосфералық резерваттар желісінің құрамына қосылды.
Бүгінде қорық су құстарының ұя салатын, түлейтін және маусымдық көші-қон кезінде аялдайтын Қазақстандағы ең маңызды табиғи аумақтардың бірі болып есептеледі. Мұнда құстардың 330 түрі тіркелген, оның ішінде 133 түрі тұрақты түрде ұялайды. Сондай-ақ 16 түрі Қазақстанның Қызыл кітабына енгізілген. Ал көне дәуір шағаласы Алакөл қорығының басты символына айналған.
Қорық аумағында сүтқоректілердің 35 түрі мекендейді. Олардың қатарында қабан, түлкі, борсық, елік, қоян, ондатр және қасқыр кездеседі. Сонымен бірге мұнда балықтың 18 түрі тіршілік етеді. Оның 9 түрі – жергілікті балықтар, ал Балқаш алабұғасы мен Балқаш қарабалығы осы өңірге ғана тән эндемиктер қатарына жатады.
Алакөл ойпатында бауырымен жорғалаушылардың 24 түрі таралған болса, оның 10 түрі қорық аумағында кездеседі. Қосмекенділердің екі түрі тіркелген, олардың бірі – даната құрбақасы Қазақстанның Қызыл кітабына енгізілген. Сонымен қатар қорықта жәндіктердің 392 түрі және өсімдіктің 290 түрі өседі.
Алакөл қорығы – еліміздің табиғи байлығы мен биоалуантүрлілігін сақтауда ерекше маңызға ие аумақтардың бірі. Сондықтан табиғатты қорғау, қоршаған ортаға ұқыпты қарау және осындай бірегей мекендерді келешек ұрпаққа сақтау – әрбір азаматтың ортақ жауапкершілігі.