SteppeNews.kz: Халықаралық көші-қон ұйымының (IOM) шешімімен БҰҰ-ның көші-қон жөніндегі жаһандық ізгі ниет елшісі мәртебесін алған Димаш Құдайберген Кокс-Базар аймағына арнайы сапармен барды. Әлемге танымал өнер иесі бұл өңірдегі гуманитарлық миссиясы аясында өз шаңырақтарын тастап кетуге мәжбүр болған бір миллионнан астам адамның жағдайымен танысты. Кокс-Базардағы босқындар тұратын мекендер су тасқыны, жер көшкіні, өрт және жойқын циклондар жиі орын алатын өте қауіпті аймақтарда орналасқан.
Сапар барысында Димаш Құдайберген мұқтаж жандарды баспанамен және ең қажетті тұрмыстық заттармен қамтамасыз ететін арнайы орталықтардың қызметін өз көзімен көрді. Сонымен қатар, ол жергілікті халықтың төл мәдениетін, музыкалық мұрасы мен ежелгі дәстүрлерін сақтауға арналған Мәдени жады орталығына атбасын бұрды. Мұнда өнерпаз өңірдегі музыканттармен және аспап жасаушы шеберлермен жүздесіп, шығармашылық сұхбат құрды.
Қазіргі таңда Кокс-Базар ауданы тұрақты түрде гуманитарлық көмекке зәру мәжбүрлі қоныс аударушылар шоғырланған ірі аймақ болып қалуда. Осыған байланысты халықаралық ұйымдар мен жергілікті серіктес мекемелер тұрғындарды баспанамен қамту, медициналық қызмет көрсету, білім беру және әлеуметтік қолдау бағыттары бойынша жұмыстарын үздіксіз жалғастырып келеді.
