Ақтөбеде өңірдегі ең ірі экологиялық жобалардың бірі — жаңа тазарту құрылыстарын салу жұмыстары басталды. Құны 53 млрд теңге болатын Қазақстан-Қытай жобасын 2028 жылғы қыркүйекте аяқтау жоспарланып отыр. Нысан пайдалануға берілгеннен кейін тәулігіне 100 мың текше метр ағынды суды тазарта алады, деп хабарлайды SteppeNews.kz
Жобаны Қытайдың үш ұйымы: China Civil Engineering Construction Corporation (CCECC), Zhongrong Construction Investment және Солтүстікқытайлық муниципалдық жобалау-зерттеу институты (NCME) жүзеге асырып жатыр. Әр компания өз бағытына — құрылысқа, ағынды суларды тазарту технологияларына және инженерлік жобалауға жауап береді.
«Біз үш компанияның тәжірибесін біріктірдік»
Жоба жетекшісі Чжао Да Хао нысан Қазақстанның экологиялық талаптары мен коммуналдық инфрақұрылым саласындағы халықаралық тәжірибені ескере отырып құрылып жатқанын атап өтті.
«Ақтөбедегі тазарту құрылыстарын салу жобасын Қытайдың үш ұйымы бірлесіп жүзеге асырып жатыр. CCECC ірі халықаралық инфрақұрылымдық нысандарды салуда мол тәжірибеге ие, Zhongrong ағынды суларды тазарту және су ресурстарын қорғауға маманданған, ал NCME коммуналдық инфрақұрылымды жобалауға жауап береді. Бірлесе отырып, біз жобаны жүзеге асырудың толық циклін қамтамасыз етеміз», — деді жоба жетекшісі Чжао Да Хао.
Қытайлық мамандар болашақ кешеннің технологиялық сызбасын көрсетті. Пайдалануға берілгеннен кейін тазарту құрылыстары тәулігіне 100 000 текше метр ағынды суды өңдей алады. Бүкіл процесс механикалық, биологиялық және ультракүлгін тазартудың бірнеше кезеңінен тұрады.
Чжао Да Хаоның айтуынша, ағынды су алдымен ірі және ұсақ торлардан өтеді. Мұнда ірі қоқыс ұсталып қалады. Содан кейін су аэротенктерге түсіп, онда микроорганизмдердің көмегімен биологиялық тазарту жүргізіледі. Соңғы кезеңде химиялық реагенттерді қолданбай бактериялар мен басқа да микроорганизмдерді жоятын ультракүлгін залалсыздандыру жүзеге асырылады.
Толық тазарту циклінен кейін тазартылған су Қазақстан Республикасының экологиялық нормативтеріне сәйкес келеді. Ол ауызсуға арналмаған, алайда жасыл желектерді суаруға, техникалық қажеттіліктерге және қаланы абаттандыруға қауіпсіз пайдаланылуы мүмкін. Тазартылған судың артығы арнайы тұндырғыш арқылы өзенге жіберіледі.
Тұнба электр энергиясы мен тыңайтқышқа айналады
Жобаның негізгі ерекшеліктерінің бірі — ағынды сулардың тұнбасын өңдеуге арналған кешен болады.
Өкілдердің түсіндіруінше, түзілетін тұнба анаэробты ашыту процесінен өтеді. Оның нәтижесінде биогаз бөлінеді. Алынған газ электр энергиясын өндіруге жұмсалып, кешеннің өз қажеттіліктерінің бір бөлігін қамтамасыз етеді.
Сусыздандыру мен өңдеуден кейін тұнба қоршаған орта үшін қауіпсіз болады. Оны органикалық тыңайтқыш ретінде қолдануға, сондай-ақ кірпішті қоса алғанда, жекелеген құрылыс материалдарын өндіруге пайдалануға болады.
Қазір — 100 жұмысшы, келесі кезеңде — 200
Қазір құрылыс алаңында шамамен 100 маман жұмыс істеп жатыр. Жұмыс көлемі кеңейген сайын қызметкерлер саны шамамен 200 адамға дейін артады.
«Бұл жоба экологиялық жағдайды жақсартып, Ақтөбе тұрғындарының өмір сүру сапасын арттыруға нақты үлес қосады деп үміттенеміз. Заманауи технологиялар қала мен оның болашағының игілігіне қызмет етуі керек», — деп атап өтті Чжао Да Хао.
Жаңа тазарту құрылыстары 45 жылдан астам уақыт бұрын салынған қолданыстағы станцияның орнын басады және Ақтөбе облысының экологиялық инфрақұрылымындағы маңызды нысандардың біріне айналады.
Келесі материал: Қазақстанның сауда профициті $14 млрд-қа жетті, бұл қаншалықты тұрақты?