Алматы онкологиялық орталығында Қазақстанда алғаш рет ExacTrac Dynamic Brainlab жаңа буынның позициялау жүйесі қолданысқа енгізілді. Жаңа технология Алматы қаласы әкімдігі мен Қоғамдық денсаулық сақтау басқармасының қолдауымен іске асырылып, онкологиялық науқастарға көрсетілетін сәулелік терапияның сапасы мен дәлдігін арттыруға мүмкіндік береді деп хабарлайды SteppeNews.kz, Алматы қаласы әкімдігіне сілтеме жасап.
Бұл жүйе әртүрлі орналасқан қатерлі ісіктерді, соның ішінде бас миындағы ісіктер мен көптеген метастаздарды емдеуге арналған. Емдеу барысында құрылғы пациенттің дене қалпын үздіксіз бақылап, тыныс алу кезінде болатын болмашы қозғалыстарды да тіркейді. Егер қандай да бір ауытқу байқалса, сәулелендіру автоматты түрде тоқтатылып, емнің қауіпсіздігі қамтамасыз етіледі.
Мамандардың айтуынша, жаңа технология сәуле дозасын ісікке барынша дәл бағыттап, сау тіндер мен ағзаларға түсетін сәулелік жүктемені азайтады. Бұл емдеу тиімділігін арттырып, пациенттердің өмір сүру сапасын жақсартуға ықпал етеді.
Бүгінде Алматы онкологиялық орталығында күн сайын шамамен 100 тұрғын сәулелік терапия курсынан өтеді.
Алматы онкологиялық орталығының сәулелік терапия бөлімшесінің меңгерушісі Евгений Ишкининнің айтуынша, жаңа жүйені енгізу жоғары технологиялық онкологиялық көмекті дамытудағы маңызды қадам болды.
«Бұл жүйе рентгендік, оптикалық және термалды 3D-визуализацияны пайдалана отырып, пациенттің дене қалпын алты координат бойынша үздіксіз бақылайды. Тіпті, тыныс алуға байланысты аздаған қозғалыстың өзі емнің дәлдігіне әсер етуі мүмкін. Сондықтан қандай да бір ауытқу анықталған жағдайда сәулелендіру автоматты түрде тоқтатылады. Бұл жоғары сәуле дозасын ісікке барынша дәл жеткізуге, сау тіндерге түсетін сәулелік жүктемені азайтуға және емнің тиімділігін арттыруға мүмкіндік береді», – деді Евгений Ишкинин.