Қытайдың Ганьсу провинциясына өңірдің өнеркәсіптік, мәдени және экономикалық әлеуетімен танысу үшін әлемнің әр түкпірінен журналистер келді. Сапар барысында олар Қытайдағы як сүтінен өнім өндіретін жетекші кәсіпорындардың бірі – «Ганьсу Хуалин» акционерлік қоғамының жұмысымен танысты, деп хабарлайды SteppeNews.kz.
Кәсіпорын Ганьсу провинциясындағы Ганьнань-Тибет автономиялық округінде орналасқан. Бұл өңір экологиялық таза биік таулы жайылымдары мен як шаруашылығының дамуына байланысты «Қытайдың як сүті астанасы» ретінде танымал. Осында өндірілетін табиғи қодас сүті жоғары сапалы сүт өнімдерін дайындауға пайдаланылады.
Компания өкілдерінің айтуынша, кәсіпорын 1994 жылы құрылған. Бүгінде ол жоғары технологияларды қолданатын ұлттық деңгейдегі ірі өндірушілердің біріне айналған. Мұнда қодастың құрғақ сүті, казеин және балалар тағамын өндіруде қолданылатын минералсыздандырылған сүт сарысуы шығарылады.
Журналистердің ерекше қызығушылығын кәсіпорынның заманауи өндірістік кешені мен сүтті терең өңдеуге арналған инновациялық технологиялары тудырды. Ғылыми зерттеулерге салынған инвестицияның арқасында компания минералсыздандырылған сүт сарысуын өндіретін бірегей технологияны енгізіп, Қытайдың импорттық шикізатқа тәуелділігін азайтуға үлес қосып отыр.
Кәсіпорын өндірістен бөлек әлеуметтік жауапкершілікке де басымдық береді. «Ганьсу Хуалин» он мыңдаған фермерлік шаруашылықпен жұмыс істеп, жергілікті тұрғындардан сүт пен өзге де шикізатты сатып алады. Бұл ауылдық жерлерде жаңа жұмыс орындарын ашуға, дәстүрлі мал шаруашылығын дамытуға және халықтың әл-ауқатын арттыруға мүмкіндік береді.
Компания өнімдері бүгінде әлемнің көптеген еліне экспортталады. Өндіріс халықаралық ISO, GMP, HACCP және HALAL сапа стандарттарына толық сәйкес келеді.
Экскурсия соңында шетелдік журналистерге қодас сүтінен дайындалған өнімдердің дәмін көру мүмкіндігі ұсынылды. Қонақтар түрлі сүт өнімдерінің ерекше дәмімен танысып, кәсіпорынның фирмалық дүкенінен өздеріне ұнаған өнімдерді сатып алды.
Компания өкілдерінің айтуынша, қодас сүтінен өндірілетін өнімдер жоғары ақуыз мөлшерімен, дәрумендерге, минералдарға және басқа да пайдалы қоректік заттарға бай болуымен ерекшеленеді. Сондықтан олар тек дәмді ғана емес, денсаулыққа да пайдалы өнім саналады.