Алматыда Қазақстан мен Орталық Азия елдерінің жас көшбасшыларын біріктірген Almaty Youth Forum 2026 халықаралық жастар форумы басталды. Іс-шараның негізгі тақырыптары жасанды интеллект, климаттық технологиялар, цифрлық қауіпсіздік, волонтерлікті дамыту және әлеуметтік инновацияларға арналды.
Форумның мақсаты мен ұйымдастырушылары
Форумды Алматы қаласының әкімдігі, Қазақстандағы БҰҰ Балалар қоры (ЮНИСЕФ) және Алматы волонтерлерінің фронт-офисі ұйымдастырды. Іс-шара Тұрақты даму жолындағы халықаралық еріктілер жылы аясында өтіп жатыр.
Алматы қаласы Жастар саясаты басқармасының басшысы Азиз Кажденбек жастарға өз идеяларын нақты жобаларға айналдыруға мүмкіндік берудің маңызын атап өтті.
«Бүгінде жастар үшін идеяларын нақты жобаларға айналдырып, бастамаларына мемлекет, халықаралық ұйымдар мен бизнес тарапынан қолдау көрсетілетін орта қалыптастыру аса маңызды. Almaty Youth Forum дәл осындай алаңға айналып, Қазақстан мен Орталық Азия жастарын тұрақты даму мен волонтерлік саласындағы ортақ құндылықтар төңірегінде біріктіріп отыр», – деді Азиз Кажденбек.
Форумның екі күндік бағдарламасына панельдік пікірталастар, практикалық воркшоптар мен сарапшылардың баяндамалары енгізілген. Кездесулер жасанды интеллект, қаржылық сауаттылық, инвестиция және экология бағыттарын қамтиды.
UNICEF Zhastary Hub құрылады
Форумның алғашқы күніндегі маңызды нәтижелердің бірі – ЮНИСЕФ пен әл-Фараби атындағы Қазақ ұлттық университеті арасында ынтымақтастық туралы меморандумға қол қойылуы.
Университет базасында UNICEF Zhastary Hub орталығы құрылады. Ол волонтерлік қозғалысты дамытуға және өңір жастарының бастамаларын қолдауға арналған заманауи алаң болмақ.
Жастардың инновациялық жобалары таныстырылды
Форум аясында инновациялық жобалардың көрмесі ұйымдастырылды. Қазақстан мен Қырғызстаннан түскен 211 өтінімнің ішінен сарапшылар 29 жобаны финалға таңдады.
Олардың қатарында:
- GLOFcast – жасанды интеллект пен спутниктік деректерді пайдалана отырып, мұздық көлдердің жарылуы қаупі туралы ерте ескерту жүйесі;
- Samruq.AI – өнеркәсіптік кәсіпорындардағы қауіпсіздік деңгейін арттыруға бағытталған технологиялық шешім;
- EcoTube – автокөліктерден тарайтын зиянды шығарындыларды айтарлықтай азайтуға бағытталған жоба.
Форумның екінші күні
11 тамызда форум жұмысы Almaty Museum of Arts алаңында жалғасады. Қатысушыларды шығармашылық сессиялар, ашық пікірталастар және жастар жобалары байқауының финалы күтеді.
Байқаудың финалы барысында үздік он команда өз жобаларын сарапшылар алқасының алдында таныстырады. Жеңімпаздарға бастамаларын іске асырып, одан әрі масштабтауға көмектесетін менторлық қолдау көрсетіледі.