10 қарашада Қытайдың Шыңжаң-Ұйғыр автономиялық ауданындағы Қарамай қаласында «Мұнай қаласы — кездесу, туризм және достық мекені» атты II халықаралық мәдени іс-шара өтті. Оған Қытай, Қазақстан, Өзбекстан, Қырғызстан және Тәжікстан өкілдері қатысты. Кездесуде халықаралық байланыстарды дамыту, мәдени алмасудағы бұқаралық ақпарат құралдарының рөлі және өңірлер арасындағы ынтымақтастықтың жаңа бағыттары сөз болды. Бұл туралы SteppeNews.kz хабарлайды.
Қарамай — тарихы Қытайдың мұнай өнеркәсібімен тығыз байланысты қалалардың бірі. Бүгінде мұнда энергетика саласымен қатар, цифрлық технологиялар мен жаңа өндіріс бағыттары дамып келеді. Сонымен бірге туризм де қаланың маңызды даму салаларының біріне айналған. Өңір табиғи көрікті орындарымен және мәдени жобаларымен де белгілі.
Қаланың тарихы, экономикалық дамуы мен болашақ мүмкіндіктері туралы Қарамай қалалық партия комитеті хатшысының орынбасары Ван Бин баяндады. Оның айтуынша, қала мұнай кен орындарын игеруден бастап, заманауи өнеркәсіптік және технологиялық инфрақұрылымы қалыптасқан орталыққа дейінгі даму жолынан өткен. Мұнай-газ саласы әлі де экономикадағы негізгі бағыттардың бірі саналады. Сонымен қатар жаңа салалар қаланың өндірістік әлеуетін кеңейтіп келеді.
«Хэйюшань кен орнындағы алғашқы бұрғылау қондырғыларының жұмысынан бастап, заманауи есептеу қуаттары қаласына дейін, дәстүрлі мұнай мен газ өндіруден жаңа энергия көздерін, жаңа материалдар мен цифрлық экономиканы кешенді дамытуға дейін Қарамай жаңару мен жаңғырту жолында сенімді қадам басып келеді», — деді Ван Бин.
Ол қаланың цифрлық дамуы мен экологиялық жағдайына қатысты көрсеткіштерді де таныстырды. Қарамайдың есептеу қуаты 23 мың P-ға жеткен. Қала аумағының 44,3 пайызы көгалдандырылған, ал ауа сапасы жақсы күндердің үлесі 90,4 пайызды құрайды. Бюджет шығындарының шамамен 70 пайызы әлеуметтік қажеттіліктерге бағытталады. Қала тұрғындарының күтілетін өмір сүру ұзақтығы — 81,9 жас.
Өңірдің туристік әлеуетін «Ібіліс қаласы» табиғи кешені, Үлкен шатқал және Дуку тасжолы айқындайды. Сонымен қатар Қарамай киноиндустрия өкілдерін де қызықтырады. Мұнда 50-ден астам кино және телевизиялық жоба түсірілген.
Кездесуде Шыңжаң-Ұйғыр автономиялық ауданы партия комитетінің үгіт-насихат департаменті басшысының орынбасары Чжоу Хунъюн де сөз сөйледі. Ол Шыңжаңның Ұлы Жібек жолы бойындағы стратегиялық орналасуына және Қытайдың Орталық Азия мен Еуразияның басқа өңірлерімен байланысын дамытудағы рөліне тоқталды.
«Мәдениет алмасу арқылы сан қырлы бола түседі, ал өркениеттер бір-бірін тану арқылы байиды. Қарамай сіздер үшін бүкіл Шыңжаңды танытатын терезеге айналады деп үміттенемін. Осы арқылы өңірдің өткені мен бүгінін тереңірек танып, оны әлемге жеткізе аласыздар», — деді Чжоу Хунъюн.
Кездесудің маңызды бөлімдерінің бірі халықаралық БАҚ-тың өңіраралық байланыстарды дамытудағы рөліне арналды.
«AQTOBE» басылымының бас редакторы Райгүл Еңшібай өз сөзінде Ақтөбе мен Қарамай қалаларының географиялық тұрғыдан алшақ орналасқанына қарамастан, экономикалық дамуында, өнеркәсіптік тарихында, еңбек дәстүрлерінде және болашаққа ұмтылысында ортақ тұстар бар екенін атап өтті.
«Қалалар арасындағы достық тек келісімдер мен ресми кездесулерден тұрмайды. Оның негізінде адамдар, олардың тарихы мен өмірлік тәжірибесі жатыр. Біз бір-біріміз туралы ақпарат таратумен ғана шектелмей, бірлескен жобалар құрып, журналистер мен жастар арасындағы алмасуды дамытуымыз керек. Осылайша қалаларымызды картада ғана емес, адамдардың жүрегінде де жақындастыра аламыз», — деді ол.
Райгүл Еңшібай қазіргі БАҚ-тың міндеті ақпаратты жедел жеткізумен шектелмейтінін де айтты. Оның пікірінше, медиа басқа қоғамдардың тыныс-тіршілігін түсінуге, мәдениетімен және адамдарымен жақынырақ танысуға мүмкіндік беруі керек. Ынтымақтастықтың перспективалы бағыттары ретінде бірлескен деректі жобалар, журналистер алмасуы, жастарға арналған медиа жобалар және қалалардың тарихы, мәдени мұрасы мен қазіргі дамуы туралы жарияланымдар ұсынылды.
Қарамаймен байланысты кеңейтуге басқа елдердің өкілдері де қызығушылық білдірді.
Өзбекстанның Самарқанд облысы Ақдария ауданы әкімінің орынбасары Елбек Жанибеков Қарамаймен байланысты нығайтып, өзара тиімді өңіраралық жобаларды жүзеге асыруға дайын екенін жеткізді.
Бейжің университетінің Халықаралық коммуникациялар институтының директоры Ван Вэйцзя қаланы халықаралық деңгейде таныту жүйелі жұмысты қажет ететінін атап өтті. Оның айтуынша, бұл үдеріс алдымен қаламен танысудан басталып, кейін шетелдік серіктестермен тұрақты байланыс орнатуға ұласуы тиіс.
Тәжікстанның «Ховар» ұлттық ақпарат агенттігінің халықаралық бөлімінің басшысы Файзали Курбонзода заманауи қалалардың халықтарды жақындастырудағы маңызына тоқталды. Оның пікірінше, бұқаралық ақпарат құралдары елдер арасындағы өзара түсіністікті нығайтып, халықтардың мәдениетімен жақынырақ танысуға мүмкіндік беретін маңызды көпір бола алады.
Кездесу соңында «Мұнай қаласында кездесеміз» атты бірлескен бастама ұсынылды. Жоба Қарамай мен шетелдік серіктестер арасындағы халықаралық коммуникацияны дамытуға және байланыстарды нығайтуға бағытталған.
Келесі материал: Өзбекстанның сегіз жекеменшік университеті Times Higher Education халықаралық рейтингіне енді