Қазақстандық кәсіпкерлердің 70%-дан астамы бизнесін дамыту үшін TikTok платформасын айына кемінде бір рет пайдаланады, ал сауалнамаға қатысқандардың 88,3%-ы платформаның жаңа клиенттерді тартуға оң әсерін тигізетінін атап өтеді. Мұндай мәліметтер Кәсіпкерлер күні қарсаңында 28 қазанда Алматыда өткен TikTok Impact Forum шарасында ұсынылды, деп хабарлайды SteppeNews.kz.
«TikTok әсері: платформаның Қазақстандағы шағын және орта кәсіпкерлікке ықпалы» атты жаңартылған зерттеу нәтижелерін TikTok «Атамекен» ҚР Ұлттық кәсіпкерлер палатасымен бірлесіп дайындады. Сауалнама елдің барлық 20 өңірінен 206 компанияны және жеті салалық бағытты қамтыды. Зерттеу 2026 жылдың қыркүйек–қазан айларында жүргізілді.
Нәтижелерге сәйкес, сауалнамаға қатысқан компаниялардың 43,7%-ы TikTok-ты бизнес мақсаттарында ай сайын пайдаланады. Бір жыл бұрын бұл көрсеткіш 29,5% болған еді. Тағы 27,2% кәсіпорын платформаға апта сайын немесе одан да жиі жүгінеді.
TikTok кәсіпкерлер үшін тек жылжыту құралы ғана емес, сонымен бірге қосымша табыс алу арнасына айналуда. Өз түсімінің 5%-дан астамын платформадағы белсенділікпен байланыстыратын компаниялар үлесі 57,8%-ға жетті. Бұл өткен зерттеумен салыстырғанда 12,3 пайыздық тармаққа артық. Сауалнамаға қатысқан кәсіпорындардың 14,6%-ы үшін мұндай түсімнің үлесі жалпы табыстың кемінде төрттен бірін құрайды.
TikTok-тың клиенттермен өзара іс-қимылға оң ықпалын сауалнамаға қатысқандардың 83,5%-ы атап өтті, ал 73,3%-ы платформа бәсекелестер арасынан даралануға көмектеседі деп есептейді.
Жылжытудың ең кең тараған тәсілі органикалық контентті жариялау болып қала береді: 2026 жылы сауалнамаға қатысқан компаниялардың 77,6%-ы бейнероликтер орналастырған. Бұл ретте контент авторларымен ынтымақтастық танымал бола түсті — мұндай кәсіпорындардың үлесі 10,4%-дан 22,8%-ға дейін артты. Ақылы жарнаманы респонденттердің 18%-ы пайдаланды.
Жалпы алғанда, TikTok-та жылжытуға, соның ішінде контент өндіруге, SMM-мамандардың қызметіне, жарнамаға және авторлармен ынтымақтастыққа қаражат бөлетін компаниялар үлесі 2025 жылғы 62,3%-дан 2026 жылы 75,7%-ға дейін өсті.
Қарқынды динамика жекелеген салаларда байқалады. Түсімінің кемінде 5%-ын TikTok-пен байланыстыратын компаниялар үлесі жылжымайтын мүлік саласында 40,6 пайыздық тармаққа артып, 66,6%-ға жетті. Мәдениет, ойын-сауық және туризмде бұл көрсеткіш 24,7 пайыздық тармаққа өсіп, 60,5%-ды, ал азық-түлік тауарлары сегментінде 18,1 пайыздық тармаққа өсіп, 56,8%-ды құрады. Қоғамдық тамақтану саласында бұл көрсеткіш 68%-ды, ал азық-түлік емес тауарлар сегментінде 53,5%-ды құрады.
Зерттеуде сонымен қатар платформаны пайдаланумен байланысты шағын және орта бизнестің ықтимал түсімінің модельдік бағалаулары камтылған. TikTok-ты кәсіпкерлердің 10%-ы белсенді пайдаланады деген шартта, 2026 жылға арналған есептік көрсеткіш шамамен 531,6 млрд теңгені құрайды. 15% қамтылған кезде ол 797,4 млрд теңгеге жетеді, ал 20% болғанда — 1,06 трлн теңге болады.
Зерттеу авторлары бұл барлық қазақстандық ШОБ сатылымының өлшенген көлемі немесе TikTok-тың елдің ЖІӨ-сіне қосқан тікелей үлесін бағалау емес, кәсіпкерлердің бағалаулары негізіндегі сценарлық есептеулер екенін баса айтады. Сауалнама қатысушылардың тәжірибесін көрсетеді және бүкіл сектор үшін статистикалық репрезентативті болып табылмайды. Бұдан бөлек, платформаны пайдалану мен түсім арасындағы анықталған байланыс дәл TikTok оның ұлғаюына себеп болғанын дәлелдемейді.
Практикалық мысалдар қазақстандық компаниялардың тауарлар мен қызметтерді жылжыту үшін платформаны қалай пайдаланатынын көрсетеді. Шымкенттік Al-AN Duken киім бренді бір жыл ішінде TikTok-тағы аудиториясын шамамен 15 мың жазылушыға, ал сатуды шамамен 20%-ға арттырды. Компания мәліметінше, тікелей эфирдің бір сағаты орта есеппен 15–20 өтінім және үштен алтыға дейін сатылым әкеледі.
Шығыс Қазақстаннан шыққан Lesnoe VKO табиғи бал өндірушісі органикалық контенттің арқасында елден тыс жерлерден де сатып алушыларды тартып, экспорттық түсімнің өсуін шетелдік аудиторияның өз өніміне деген қызығушылығымен байланыстырады.
Doner na Satpayeva жылдам тамақтану желісі клиенттермен өзара іс-қимыл жасау үшін TikTok-тағы қатысуын дамытуда. Компания аккаунтында миллионнан астам жазылушы бар. Төрт жыл ішінде желі Алматыда 13 нүктеге дейін өсті, ал жақын арада жаңа қалаға шығуды жоспарлап отыр.
Зерттеу нәтижелері мен жергілікті компаниялардың мысалдары TikTok-ты қазақстандық шағын және орта бизнестің танымалдылықты арттыру, клиенттерді тарту және өнімді жылжыту үшін жиі пайдаланатынын көрсетеді. Бұл ретте экономикалық әсердің ауқымы салаға, жылжыту стратегиясына және кәсіпкерлердің өз белсенділігіне байланысты болады.
Келесі материал: Өзбекстанда дәрігерлер мен медбикелердің жалақысы пациенттердің бағасына байланысты болады