Моңғолияның Ұлттық Шыңғыс хан музейінде итальян өнеріне арналған көрме ашылды. Ұлан-Батырға Италияның Қайта өрлеу дәуірі мен барокко өнерінің туындылары жеткізілді деп хабарлайды SteppeNews.kz Монголия сейчас сайтына сілтеме жасай отырып.
«Даладағы ұлы теңіз желі: Рафаэль мен Бернини» деп аталатын көрмеде Римдегі Боргезе галереясының өнер туындылары ұсынылған. Экспозицияның басты жұмыстарының қатарында Рафаэль Сантидің «Портреті» және Джан Лоренцо Бернинидің әйгілі «Нептун мен Тритон» мүсінінің қола көшірмесі бар.
Көрмеде бұл екі туынды қатар ұсынылып, адамның билікті қабылдауындағы екі түрлі көркемдік тәсіл көрсетілген. Рафаэльдің шығармасы байсалдылық, үйлесім мен ойға шомуды бейнелесе, Бернинидің жұмысы қозғалыс, қуат және эмоциялық әсерімен ерекшеленеді.
Экспозиция кеңістігі келушілерді өнер тарихындағы өзіндік саяхатқа жетелейтіндей ұйымдастырылған. Барокко өнерінің динамикалық формаларынан кейін көрермендер Қайта өрлеу дәуірінің сабырлы әрі үйлесімді эстетикасына өтеді. Осы арқылы екі түрлі көркемдік бағыттың бір-бірін толықтыратыны көрсетіледі.
Италияның Моңғолиядағы елшісі Джованна Пиккаррета бұл жобаны тарихи Жібек жолының заманауи жалғасы деп атады. Оның айтуынша, бірнеше ғасыр бұрын керуендер арқылы тауарлармен бірге идеялар мен мәдени құндылықтар да тараған. Бүгінде өнер түрлі мәдениеттерді байланыстырып, елдер арасындағы дипломатиялық қарым-қатынасты нығайтуға ықпал етеді.
Елшінің сөзінше, көрме Италия мен Моңғолия арасындағы ынтымақтастықты дамытудағы маңызды қадамдардың бірі.
Ұлан-Батыр тұрғындары мен қала қонақтары әлемдік мәдени мұраның белгілі туындыларын елден шықпай тамашалай алады. Көрме 1 қарашаға дейін жұмыс істейді.
Келесі материал: Төрехан Сабырхан 12 жылдан кейін Қазақстанға бокстан Азия ойындарының алтынын әкелді