SteppeNews.kz: Алматы төрінде қос елдің мәдениетін тоғыстырған айтулы шара өтіп, студенттер мен оқушылар өзара тәжірибе алмасты.
«Alatau Creative Hub» алаңында «Қазақстан мен Қытай: Жібек жолындағы мәдениеттер жақындасуы» атты мәдени-танымдық кеш өтті. Екі елдің жастарын бір арнаға тоғыстырған бұл шара халықтар арасындағы рухани байланысты нығайтуды көздеді.
Кештің шымылдығы Қазақстан мен Қытай достығына арналған бейнероликпен түрілді. Мерекелік бағдарламаның көркі болған концертте қазақстандық және қытайлық студенттер өнер көрсетті. Сахна төрінде қазақ, орыс және қытай тілдерінде әуезді әндер шырқалып, мың бұралған билер биленді. Әсіресе, ұлттық аспаптардың сүйемелдеуімен орындалған шығармалар көрерменнің ыстық ықыласына бөленді. Бұл жай ғана концерт емес, екі ел жастарының бір-бірінің өнеріне деген құрметін көрсеткен нағыз мәдени алмасу алаңына айналды.
Концерттен кейін қонақтар арнайы ұйымдастырылған танымдық аймақтарға саяхат жасады. Қатысушылар қытайдың каллиграфия өнерімен танысып, желпуіш бояуды және қағаздан ою ойып үйренді. Сонымен қатар, қазақтың ұлттық қолөнері, ою-өрнектері мен әшекей бұйымдары да кеңінен таныстырылды. Шараның ең әсерлі сәттерінің бірі — қазақстандық оқушыларға қытайлық ойыншықтардың сыйға тартылуы болды. Бұл кішігірім сыйлықтар балалар үшін достықтың белгісіндей қабылданып, кешке ерекше жылылық сыйлады. Қонақтар екі елдің ұлттық костюмдерін киіп фотоаймақта суретке түсіп, дәмді тағамдардан ауыз тиді.
Айтулы шараға ҚХР-дың Алматыдағы Бас консулдығының білім беру мәселелері жөніндегі консулы Хуан Сяоминь ханым, «Лаоши» орталығының директоры Татьяна Каукенова, әл-Фараби атындағы ҚазҰУ-дың кафедра меңгерушісі Бақыт Айтбаева және «Белдеу және Жол» орталығының директоры Нурат Ильяс арнайы қатысты. Ұйымдастырушылар — «Лаоши» білім беру орталығы, «Белдеу және Жол» орталығы, ҚазҰУ-дың факультетаралық кафедрасы және «Alatau Creative Hub» ұжымы — мұндай бастамалар екі мемлекет арасындағы гуманитарлық байланысты бекемдеп, болашақ серіктестікке жол ашатынына сенім білдірді.
