Еуропарламенттің 40 депутаты Еуроодақтан Израильмен арадағы Ассоциациялық келісімді тоқтатып, Нетаньяху үкіметіне санкция салуды талап етті. Бұл мәлімдеме Газа секторындағы гуманитарлық дағдарыстың ушығуына байланысты жасалды, деп хабарлайды steppenews.kz Euronews-ке сілтеме жасап.
Депутаттардың айтуынша, Израильдің әрекеті Женева конвенциясын және халықаралық гуманитарлық құқықты өрескел бұзады. Олар «моральдық батылдық уақыты келді» деп, ЕО-ны нақты қадамдарға шақырды. Бірлескен мәлімдемеде ХАМАС қозғалысынан да 2023 жылғы 7 қазандағы шабуыл кезінде тұтқынға түскен израильдік азаматтарды босатуды талап етеді.
Депутаттар Еурокомиссияны Ассоциациялық келісімді дереу тоқтатуға, сондай-ақ Израильдің министрлеріне шектеу қоюға үндеп отыр. Айта кетейік, бұған дейін Ұлыбритания, Норвегия және Нидерланд Израильдің екі министріне сапарлық шектеу енгізген болатын. ЕО шеңберінде мұндай шара әзірге қабылданған жоқ.
Мәлімдемені қолдаушылар 15 елдің өкілдері: Германия, Франция, Италия, Испания және тағы басқалар. Олар алты түрлі саяси топтан шыққан – солшылдардан бастап Еуропалық халық партиясының оңшыл орталық өкілдеріне дейін.
Еурокомиссия дүйсенбі күні Израильдің «Горизонт Еуропа» ғылыми-зерттеу бағдарламасына қатысуын ішінара тоқтату мәселесін ұсынған. Бірақ депутаттар мұны жеткіліксіз деп санайды. «Құр айыптау көмектеспейді, нақты әрекет керек», – дейді олар.
Еуропарламент мүшесі Эвин Инджир бұл үндеуді алдағы уақытта өзге депутаттар да қолдайтынын айтты. Оның айтуынша, қазіргі жағдайда Еурокомиссия мен мүше мемлекеттер шынайы шешім қабылдауға міндетті.
Олардың мәлімдемесі БҰҰ мен басқа да халықаралық ұйымдардың Газа секторындағы аштық пен аурудан өлім көбейіп жатқаны туралы ескертулерінен кейін жарияланды. Азық-түлік қауіпсіздігіне жауапты жаһандық бақылау тобы – IPC – Газа аймағында кең көлемді ашаршылық белгілері байқалып отырғанын мәлімдеді.
Израиль билігі бұл айыптауларды жоққа шығарып отыр. Олар гуманитарлық көмектің тоналып, қара базарда сатылуы дағдарысты ушықтырып жатқанын алға тартты.