Түркістан облысында су тапшылығына қарамастан, күріш егу көлемі бекітілген жоспардан 3,3 есе артық орындалып, «Қазсушар» филиалының бірқатар басшысы қатаң сөгіс алды.
Түркістан облысына жұмыс сапарымен барған Су ресурстары және ирригация министрі Нұржан Нұржігітовтің айтуынша, биыл өңірде небәрі 4 мың гектар күріш егілуі керек болған. Алайда фермерлермен 13 258 гектарға күріш суаруға келісімшарт жасалған. Министр мұны су тапшылығына себеп болған негізгі фактордың бірі деп атады.
«Биыл Түркістан облысы бойынша 4 мың гектар күріш егілуі керек еді. Ал “Достық” каналының бойында бірде-бір гектар күріш егілмеуі қажет болатын. Бірақ сіздер 13 мың гектар ектіңіздер. Осының орнына 4 мың гектар болғанда, кесте бойынша суды бәріне бөліп берер едік. Қазір осы 13 мың гектар күріш салмақ салып жатыр», – деді министр сапар барысында.
Ведомство басшысы трансшекаралық су ресурстарын пайдалануда тәртіптің бұзылғанын айтып, суды келісімшартсыз пайдаланғандарға айыппұл салынатынын ескертті. Сонымен қатар фермерлерді суды үнемдеу технологияларына көшуге шақырды.