Қазақстан мен Қытай арасындағы ынтымақтастық соңғы жылдары тек сауда және инвестиция салаларымен шектелмей, білім, ғылым және жаңа технологиялар бағытында да қарқынды дамып келеді. Бұл үдерісте жастардың рөлі ерекше маңызға ие болып отыр.
«Ассамблея жастары» РҚБ төрағасы Тимур Джумурбаевтың айтуынша, екі ел арасындағы қатынастардың тұрақтылығы жастардың осы процеске қаншалықты белсенді әрі саналы түрде араласуына тікелей байланысты.
«Қазақстан мен Қытай арасындағы қатынастардың беріктігі жастардың қаншалықты белсенді қатысуына байланысты. Жастар – тек болашақ емес, бүгінгі күннің де маңызды бөлігі. Олар жаһандық өзгерістерге тез бейімделіп, жаңа технологияларды меңгереді және ынтымақтастықтың жаңа формаларын қалыптастырады», – деді ол.
Зерттеу нәтижелері де жастардың Қытаймен ынтымақтастыққа қызығушылығы жоғары екенін көрсетеді. «Еуразиялық мониторинг» орталығы жүргізген сауалнамаға сәйкес, Астана халықаралық университетінің студенттерінің 60,7%-ы білім алу мен студенттік алмасу бағдарламаларын ең тиімді бағыттардың бірі деп санайды. Ал 57,1%-ы цифрлық технологияларды дамытуға басымдық беруді қолдаса, 53,6%-ы ғылым мен білім саласындағы ынтымақтастықты арттыру қажет деп есептейді.
Бұл үрдістер әсіресе білім беру саласында айқын байқалады. Қазақстанда Конфуций институттары жұмыс істейді, Пекин тіл және мәдениет университетінің Қазақстандағы филиалы қызмет атқарады, сондай-ақ екі елдің жоғары оқу орындары арасындағы байланыс кеңейіп келеді. Сонымен қатар жоғары технологиялық салаларға мамандар даярлау бағытындағы жобалар да дамуда.
Қазақстан мен Қытай арасындағы білім беру саласындағы ынтымақтастықтың нәтижелерінің бірі – елдегі жоғары оқу орындарында ашылған «Лу Бань шеберханалары». Д. Серікбаев атындағы Шығыс Қазақстан техникалық университетінде бұл жоба SMART-автомобиль технологияларына бағытталған. Ал М. Тынышпаев атындағы ALT университетінде робототехника және цифрлық логистика салалары дамытылса, Л.Н. Гумилев атындағы Еуразия ұлттық университетінде жасанды интеллект пен IT мамандарын даярлауға басымдық берілген.
Л.Н. Гумилев атындағы ЕҰУ-дің жасанды интеллект технологиялары кафедрасының оқытушысы Рамазан Садақасов мұндай жобалар студенттерге тек теориялық білім емес, сонымен қатар практикалық дағдылар алуға мүмкіндік беретінін атап өтті.
«Студенттер жасанды интеллект, ұшқышсыз технологиялар, автоматтандыру және ақпараттық қауіпсіздік салаларында практикалық дағдылар алады. Бұл құзыреттер Қазақстан мен Қытай ынтымақтастығы аясында құрылған кәсіпорындарда үлкен сұранысқа ие болады», – деді ол.
Сондай-ақ екі ел арасындағы ынтымақтастықтың ең перспективалы бағыттарының бірі – жоғары технологиялар саласы. Қазақстан мен Қытай цифрландыру, жасанды интеллект және жаңа экономикаға қажетті мамандар даярлау бағытында бірлесіп жұмыс істеуде.
«Тағы бір маңызды міндет – жоғары технологиялар және жасанды интеллект саласындағы ынтымақтастық. Біз цифрлық трансформация дәуірінде өмір сүріп жатырмыз, ал жастар осы үдерістің алдыңғы шебінде тұр. Бірлескен білім беру бағдарламалары, ғылыми зертханалар мен жасанды интеллект, үлкен деректер және цифрлық шешімдер саласындағы жобалар ынтымақтастықтың жаңа мүмкіндіктерін ашады», – деді Тимур Джумурбаев.
Алайда Қазақстан мен Қытай жастары арасындағы байланыс тек білім мен ғылыммен шектелмейді. Екі ел жастарының қарапайым қарым-қатынасы да маңызды рөл атқарады. Бірлескен жастар бастамалары халықтардың мәдениеті мен дәстүрін жақыннан тануға мүмкіндік береді. Осындай байланыстар өзара сыйластықты қалыптастырып, мемлекеттер арасындағы ұзақ мерзімді қатынастардың негізін қалайды.
«Қазақстан мен Қытай жастары арасындағы ынтымақтастық – тек тәжірибе алмасу емес, сонымен қатар диалог, инновация және өзара жауапкершілікке негізделген болашақ құру», – деп түйіндеді Тимур Джумурбаев.
Сауле Тугельбаева