Қытайда ЖИ арқылы түсірілетін сериалдар нарығы 22 млрд юаньнан асты

Қытайда жасанды интеллект көмегімен қысқаметражды сериалдар түсіру қарқын алып келеді. Жаңа технология өндіріс шығынын азайтып, контент әзірлеу уақытын қысқартқан. Соның нәтижесінде ЖИ арқылы жасалған сериалдар нарығы 2026 жылдың алғашқы бес айында 22 млрд юаньнан асты, деп жазады SteppeNews.kz Синьхуа ақпараттық агенттігіне сілтеме жасап.

ЖИ көмегімен түсірілген сериалдар көрермен жинап жатыр

Қытайдағы осындай жобалардың бірі – «Сун әулеті дәуіріндегі қарулы жасақ» атты қысқаметражды сериал. Оның сюжеті бойынша заманауи бес әскери қызметші Солтүстік Сун әулеті билік құрған кезеңге тап болады. Олар өздерімен бірге атыс қаруын, дәрі қобдишасын және шектеулі көлемдегі оқ-дәрі мен жанармай алып келген.

Сериалдың алғашқы бөлімі биыл 22 тамызда жарық көрген. Содан бері жоба 10 маусым мен 1 000 эпизодқа жетіп, жалпы қаралым саны 4 млрд-тан асқан. Әр бөлімнің ұзақтығы екі минутқа жетпейді. Көрермендер келесі маусымдардың шығуын күтпей-ақ, алдын ала тапсырыс беріп үлгерген.

Жобаның тағы бір ерекшелігі – оны кәсіби кино мамандары емес, әртүрлі салада жұмыс істеген алты адамнан тұратын шағын топ әзірлеген. Олардың арасында бұрын такси жүргізушісі, курьер және кеңсе қызметкері болған азаматтар бар. Команданың жетекшісі, 54 жастағы Чжан Ханьшэн ЖИ көмегімен видео жасауды былтыр наурызда өз бетінше үйрене бастаған.

ЖИ өндіріс шығынын азайтады

Жасанды интеллекттің басты артықшылығы – түсірілім процесін жылдамдатып, шығынды қысқарту. Бұрын үлкен түсірілім тобы мен қымбат декорацияны қажет ететін көріністерді енді шағын команда цифрлық құралдардың көмегімен жасай алады. Мысалы, «Сун әулеті дәуіріндегі қарулы жасақ» сериалының авторлары аптасына 100 эпизодқа дейін әзірлейді.

Бұл формат көрерменнің қысқа уақыт ішінде контент көру дағдысына да сай келеді. Сонымен қатар аудиторияның пікірлері келесі бөлімдердің мазмұнын жетілдіруге мүмкіндік береді.

Мамыр айында жарық көрген «Guixu» ғылыми-фантастикалық сериалы да технологияның мүмкіндігін көрсеткен жобалардың бірі. Оны әзірлеуге шамамен 200 мың юань (30 мың АҚШ доллары) жұмсалып, қаралым саны 100 млн-ға жеткен. Жобаны кино саласында арнайы білімі жоқ бір адам жасаған.

12 бөлімнен тұратын сериалдың әр эпизоды шамамен сегіз минутқа созылады. Оны өндіруге жұмсалған есептеу қуатының құны экрандағы бір минутқа шаққанда шамамен 2 мың юань болған. Ал осындай ғылыми-фантастикалық немесе апат туралы фильмді кәсіби актерлермен түсіру 100 есе қымбатқа түсуі мүмкін.

Саладағы жалпы көрсеткіштер де өндіріс тиімділігінің артқанын байқатады. 2026 жылдың бірінші тоқсанында ЖИ арқылы сапалы қысқаметражды сериал түсіру дәстүрлі түсіріліммен салыстырғанда шамамен 10 есе арзан болған. Ал 100 бөлімнен тұратын сериалды небәрі үш күнде әзірлеуге мүмкіндік бар.

ЖИ сценарий жазу, кадрлар ретін жоспарлау, дыбыстау, аудару және шетелдік аудиторияға бейімдеу жұмыстарын да жеңілдетеді. Mango TV компаниясының инновациялар жөніндегі маманы Хао Чэннің пікірінше, бұл технология Қытай сериалдарының шетелдік нарыққа шығуын жеделдетеді. Ол туындының негізгі сюжетін сақтай отырып, жергілікті көрерменге түсінікті әзілдерді, киім үлгілерін және декорацияларды бейімдеуге мүмкіндік береді.

Қытайда ЖИ-контент нарығы кеңейіп келеді

Қытайда ЖИ көмегімен жасалған қысқаметражды сериалдардың аудиториясы кемінде 600 млн адамға жеткен.

Ұлттық радио және теледидар басқармасының басшысы Цао Шумин қараша айының басында жыл басынан бері елде шамамен 550 мың шағын және қысқаметражды сериал жарық көргенін мәлімдеді. Бұл көрсеткіш 2025 жылдың бүкіл жылындағы нәтижеден 17 есе көп. Олардың 94 пайыздан астамы жасанды интеллект көмегімен жасалған.

DataEye зерттеу компаниясының мәліметінше, 2026 жылдың алғашқы бес айында Қытайдағы ЖИ арқылы жасалатын қысқаметражды жобалар нарығының көлемі 22 млрд юаньнан асқан. Жыл соңына дейін бұл көрсеткіш 40 млрд юаньға жетуі мүмкін.

Қытайдың ірі технологиялық компаниялары да осы нарықта өз орнын нығайтуға тырысып жатыр. Қыркүйекте Tencent компаниясы ЖИ арқылы жасалған қысқаметражды сериалдарды таратуға арналған платформасын іске қосты. Ал ByteDance пен Kuaishou бұған дейін контент жасауға және таратуға арналған өз сервистерін ұсынған.

ByteDance компаниясының Hongguo қосымшасында ЖИ арқылы жасалған қысқаметражды сериалдар негізгі контент түрлерінің біріне айналған. Шілдеде платформаның күнделікті белсенді қолданушылары 168 млн адамға жетіп, бір жылда 107 пайызға өскен. Ал қыркүйек айында пайдаланушылардың жалпы саны 430 млн-ға жеткен. Бұл көрсеткіш тек ЖИ сериалдарын емес, платформадағы барлық қысқаметражды контентті қамтиды.

Видео генерациялайтын құралдар да қарқынды дамып жатыр. Қытайдағы жетекші сервистердің бірі саналатын Kuaishou компаниясының Kling AI платформасы екі жыл ішінде 1.0 нұсқасынан 3.0 Omni нұсқасына дейін жаңарған. Биыл маусымда оның әлем бойынша қолданушылары 100 млн-нан асып, 2026 жылдың бірінші тоқсанындағы табысы 650 млн юаньнан жоғары болған.

Қазір бұл бағытта бір ғана компания басымдыққа ие емес. ByteDance әзірлеген Seedance, ShengShu Technology компаниясының Vidu және MiniMax ұсынған Hailuo платформалары кәсіби видео өндірісіне арналған құралдар қатарында.

Нарықтың дамуына кедергі келтіретін мәселелер

Өндіріс шығынының азаюы барлық жобаның табыс әкелетінін білдірмейді. DataEye компаниясы 50 млн қаралымды қысқаметражды сериалдың шығынын ақтайтын меженің бірі ретінде қарастырады. Алайда ЖИ көмегімен жасалған жобалардың тек 1,3 пайызы ғана осы көрсеткішке жетеді. Қалған 98,7 пайызы шығынын өтей алмай отыр.

Нарықтағы негізгі мәселелердің бірі – бір-біріне ұқсас контенттің көбеюі. Мыңдаған сериал бір аудиторияның назарын аудару үшін бәсекеге түседі. Нәтижесінде көрермен назары бөлініп, платформалардан түсетін табыс та азаяды. ЖИ құралдары арзан болғанымен, сапалы модельдерді пайдалану, видеоны бірнеше рет өңдеу, есептеу қуаты мен жарнамаға жұмсалатын шығын сақталады.

Контент сапасы да әлі де өзекті мәселе болып отыр. Әзірлеушілер ЖИ мүмкіндіктерін қысқа видеодан толықметражды сериалдар мен фильмдер жасауға дейін кеңейтуге тырысқанымен, технологияның ұзақ әрі тұтас оқиғаны сапалы жеткізу мүмкіндігі әлі шектеулі. Кейіпкерлердің бет-бейнесі өзгеріп кетуі, фонның тұрақсыздығы, қозғалыстың табиғи болмауы және сюжеттегі олқылықтар көрерменнің туындыға деген қызығушылығын төмендетеді.

Қытайда ЖИ көмегімен түсірілген алғашқы толықметражды көркем фильм ретінде ұсынылған «Саньсиндуй: Өткендегі болашақ» туындысы да күткен нәтижеге жете алмаған. 23 қазанда прокатқа шыққан фильм сәрсенбіге дейін небәрі 1,8 млн юань жинаған. Оны шығарған BONA Film Group компаниясы жобаны технологиялық тәжірибе ретінде қарастырып отыр. Қазір компания ЖИ көмегімен жасалатын тағы бір толықметражды фильмді әзірлеп жатыр.

Сонымен қатар Қытайда ЖИ арқылы контент өндіруге қатысты талаптар күшейтілуде. Адамның бет-бейнесі мен дауысын пайдаланбас бұрын оның келісімін алу міндеттелген. Бұған қоса, контентті алдын ала мақұлдау, техникалық тексеруден өткізу, адам тарапынан бақылау және өндіріс барысы туралы деректерді сақтау талаптары енгізілген.

Қараша айында Ұлттық радио және теледидар басқармасы сапасыз, әдепсіз және бір-бірін қайталайтын қысқаметражды сериалдарға қарсы екі айлық науқан бастаған.

Осылайша, Қытайда жасанды интеллект кино және видео өндірісінің мүмкіндіктерін кеңейтіп, контент әзірлеу құнын төмендетіп отыр. Дегенмен нарықтағы бәсекелестік, көркемдік сапа және жобалардың өзін-өзі ақтауы саланың алдағы дамуындағы негізгі мәселелер болып қала береді.