SteppeNews: Денсаулық сақтау министрлігінің мәліметінше, соңғы екі жылда медицина қызметкерлерін қолдауға бағытталған шаралардың нәтижесінде еліміздегі дәрігерлер тапшылығы 20,4%-ға төмендеді. Бұл көрсеткіш 4863,75-тен 3869,5 штаттық бірлікке дейін азайып, кадрлармен қамтамасыз ету деңгейі дамыған ЭЫДҰ елдерінің қатарына жақындады.
Ауылдық жерлердегі оң өзгерістер
Ауылдық денсаулық сақтау саласына ерекше көңіл бөлінуінің арқасында мұндағы дәрігерлер тапшылығы 26,7%-ға азайып, 821,25 штаттық бірлікті құрады. Ал орта буын медицина қызметкерлерінің жетіспеушілігі тұрақты түрде 13%-ға азайып келеді.
Мамандарды ынталандыру және әлеуметтік көмек
Ауылдық жерлердегі аса тапшы мамандықтар (акушер-гинекологтар, педиатрлар, реаниматологтар және т.б.) бойынша жұмыс істеуге келген мамандарға 8,5 млн теңге (100 ең төменгі жалақы) көлемінде біржолғы әлеуметтік төлем беріледі. Сонымен қатар, медицина қызметкерлеріне келесідей қолдау түрлері қарастырылған:
-
Қызметтік тұрғын үй беру;
-
Көтерме жәрдемақы төлеу;
-
Коммуналдық шығыстарды өтеу;
-
Кәсіби жауапкершілікті сақтандыру және заңнамалық қорғау.
Шетелге кететін мамандар саны 5 есе азайды
Жүргізілген реформалардың нәтижесінде медицина кадрларының сыртқы көші-қоны күрт төмендеді. Егер 2021 жылы шетелге 904 маман кетсе, 2025 жылы бұл көрсеткіш 186 адамға дейін, яғни шамамен 5 есеге қысқарды.
Халықаралық салыстырмалы көрсеткіштер
2025 жылы Қазақстанда халықтың әр 10 мыңына шаққанда дәрігерлер саны 41-ге жетті. Бұл көрсеткіш Ұлыбритания (34), Эстония (35) және Испания (44) сияқты мемлекеттермен деңгейлес.
