SteppeNews.kz: Белгілі қазақстандық продюсер Баян Алагузова Қазақстанның Халық әртісі Меруерт Өтекешоваға ай сайын 1 миллион теңге көлемінде өмірлік қаржылай қолдау көрсету туралы шешімін жариялады. Бұл бастама актрисаның қазақ киносы мен мәдениетінің дамуына қосқан өлшеусіз үлесіне деген жеке ризашылық белгісі болмақ. Продюсер бұл қадамды жұбайы Тұрсенғали Алагузовпен бірлесіп қабылдаған.
Продюсер өзінің Instagram парақшасында Халық әртісіне деген ақ тілегін білдіріп:
«Мен өзімнің және жұбайымның атынан сізге ризашылық белгісі ретінде ай сайын 1 миллион теңге көлемінде өмірлік төлем тағайындағым келеді», — деп жазды. Баян Алагузова актрисаны «мәңгілік Қыз Жібек» және қазақ қызының экрандағы шынайы символы деп атап өтті.
Бұл құрметтің белгісі ретінде продюсер өзі негізін қалаған «Қазақ аруы» сұлулық байқауының келесі жылғы сайысын толығымен Меруерт Өтекешоваға арнайтынын жеткізді. Сонымен қатар, ол актрисаға бағалы ішік сыйлап, алдағы уақытта тағы да жеке сыйлықтар дайындап жатқанын хабарлады.
Сонымен қатар, қоғамда аты аңызға айналған «Қыз Жібек» фильміндегі басты кейіпкер киген тарихи камзолдың тағдыры да талқылануда. Қазіргі уақытта бұл костюм Баян Алагузованың жеке коллекциясында сақтаулы, өйткені ол бұл жәдігерді кезінде сыйға алған. Продюсер бұл құнды жәдігердің болашағы туралы айта келе, оның уақыт өте келе мұражайға тапсырылуы мүмкін екенін, бірақ нақты шешім кейінірек қабылданатынын атап өтті.
