Алатау қаласында Елорданың «Бәйтерегі» іспетті зәулім Iconic towers кешені бой көтереді. Оңтүстік астананың іргесінде салынып жатқан инновациялық смарт-сити криптовалютамен есеп айырысатын және әуе таксиі қатынайтын Орталық Азияның басты іскерлік хабына айналмақ – деп хабарлайды SteppeNews.kz Tengrinews.kz-ке сілтеме беріп.
Бүгін Президент Қасым-Жомарт Тоқаев Алматы облысына жасаған жұмыс сапары аясында жаңа Алатау (Alatau City) қаласының бас жоспарымен танысты. 2050 жылға дейін дамитын бұл мега-жоба еліміздің жаңа экономикалық орталығы болмақ.
Болашақ қаланың бойтұмары
Ақылды қаланың символына айналатын Iconic towers кешені қос мұнарадан тұрады: біріншісінің биіктігі — 272 метр, екіншісі — 80 метр.
Жалпы ауданы 276,8 мың шаршы метрді құрайтын бұл заманауи нысанда мынадай инфрақұрылым қарастырылған:
• А-сыныпты кеңселер мен элиталық апартаменттер;
• 5 жұлдызды премиум қонақ үй;
• Ауқымды сауда-ойын-сауық орталығы.
Футуристік технологиялар мен ерекше мәртебе
Бас жоспар бойынша қала заманауи 4 инновациялық ауданға бөлінген. Жобаның негізгі ерекшелігі — мұнда цифрлық экожүйе қалыптасып, криптовалютамен төлеу жүйесі енгізіледі, сондай-ақ арнайы криптобиржа мен цифрлық банк ашылады. Бұған қоса, қала ішінде дрондар мен әуе таксилерінің (eVTOL) еркін қозғалысы үшін арнайы инфрақұрылым салынбақ.
Алатау қаласы негізінен жеке және шетелдік инвестиция есебінен бой көтеріп, тікелей Үкіметке бағынатын болады. Ерекше құқықтық режимнің арқасында бұл аймақ аймақтағы ең ірі логистикалық және туристік орталыққа айналады деп жоспарлануда.
Посмотреть эту публикацию в Instagram