Алматыдағы ONER Corner арт-кеңістігінде DESIGN CAMPANIA – «Сәннен тыс» ауқымды көрмесінің ашылуы өтті. Италияның оңтүстігіндегі өңірге арналған экспозиция сән, аэроғарыштық технологиялар, зергерлік шеберлік пен Қазақстанмен іскерлік диалогты біріктіре отырып, Италия туралы қалыптасқан стереотиптерді кеңейтеді, деп хабарлайды SteppeNews.kz.
Сәннен де ауқымды: индустриялық Кампанияның бес қыры
ONER Corner арт-кеңістігінде (Шевченко көшесі, 51) DESIGN CAMPANIA – «Сәннен тыс» көрмесі жұмысын бастады. Жоба қазақстандық аудиторияны Италияның астанасы Неаполь болып саналатын Кампания өңірінің заманауи дизайны және экономикалық әлеуетімен таныстырады. Экспозиция өңір компанияларының La Moda Italiana @ Almaty көрмесіне дәстүрлі қатысуы аясында ұйымдастырылды.
Көрменің ашылуына Қазақстан мен Қырғызстандағы Италия Республикасының Елшісі, мәртебелі Антонелло Де Риу, сондай-ақ дипломаттар, дизайнерлер мен мәдениет қайраткерлері қатысты. Елші атап өткендей, жоба екі ел арасындағы тығыз ынтымақтастықтың айқын дәлеліне айналды:
«Алматыдағы Design Campania – көрмеден де ауқымды дүние: бұл итальяндық шеберліктің шынайы манифесі. Бұл ауқымды нәтиже Елшілігіміздің міндеттеріне толық сәйкес келетін үлгілі ынтымақтастықтың жемісі болды. Кампания өңіріне және оның интернационалдандыру және даму басқармасына осы болашағы зор жобасы үшін алғыс айтамын. Жоба Алматыдағы Италия мәдениеті институтымен және Nova Express-пен тығыз ынтымақтастықтың арқасында жүзеге асты. Джанлуиджи Рикуперати ерекше мадақтауға лайық: оның кураторлық тұжырымдамасы стереотиптерден асып, өңірдің шынайы өндірістік өмірін көрсетуге мүмкіндік берді. Бірлескен жұмысымыздың арқасында біз Қазақстанға аэроғарыш саласы мен логистикадағы инновацияларды қамтитын, сонымен қатар зергерлік өнерден гастрономия мен шарап өндірісіне дейінгі өзіндік ерекшелігін сақтаған бірегей экожүйені ұсынып отырмыз. Бұл күш-жігерді біріктіруге негізделген кәсіпкерлік мәдениеттің елдеріміз арасындағы диалог үшін берік көпірге айналатынын көрсетеді», – деп атап өтті Антонелло Де Риу.
Экспозиция аэроғарыш саласы мен логистикадан бастап зергерлік өнер, маржан өңдеу, аяқ киім, сән және гастрономияға дейінгі бес тақырыптық аймаққа бөлінген. Аспалы полотнолар, инсталляциялар мен өнеркәсіп туралы архивтік фильмдер келушілерге нақты өндірістің ішкі үдерістеріне үңілуге мүмкіндік береді.
Неаполь – тек подиум емес: стереотиптерден тыс көзқарас
Делегация сапарының мақсаты мен өңірдің стратегиялық маңызы туралы Кампания өңірінің басшысы Серджио Маццарелла айтып берді. Оның айтуынша, Италияның оңтүстігіндегі экономика туризм мен жеңіл өнеркәсіпке қатысты қалыптасқан түсініктерден әлдеқашан асып кеткен.
«Біздің өңір Италияның оңтүстігінде, Жерорта теңізінің орталық бөлігінде орналасқан. Өңірдің басты қаласы – Неаполь. Біз өңірімізді, оның құзыреттері мен экономиканың негізгі стратегиялық салаларын ілгерілеткіміз келеді. Атап айтқанда, қазір біз Алматыда La Moda Italiana көрмелік іс-шараларына қатысатын компаниялар делегациясымен келдік. Бұл – компанияларымызбен бірге аталған іс-шараға бесінші рет қатысуымыз», – деді ол.
Маццарелла дәстүр мен озық салалардың бірегей үйлесіміне назар аударды:
«Бізде былғары бұйымдарын өндірудің өте көне дәстүрі бар. Бірақ бұл ғана емес. Бұл жолы біз алғаш рет тоқыма саласында жұмыс істейтін және ерлер мен әйелдер киімін шығаратын компанияларды таныстырдық. Италияда ерлер сәнінің өте маңызды әрі ежелден қалыптасқан дәстүрі бар.
Бізде аэроғарыш және авиация өнеркәсібінің өте қуатты секторы, сондай-ақ азық-түлік және логистика салалары жақсы дамыған. Бұл біздің Жерорта теңізінің стратегиялық бөлігінде орналасуымызбен байланысты – іс жүзінде біз Солтүстік Еуропа мен Солтүстік Африка арасындағы байланыстырушы буынбыз», – деп түсіндірді Кампания өкілі. Ол әлемдік брендтердің көпшілігі өз өнімдерін өндіруді дәл Кампания шеберлеріне сеніп тапсыратынын атап өтті.
Қолдан жасалған сандалиден киімнің цифрлық паспортына дейін
Көрмеде жекелеген өндірушілер де өздерінің бірегей өнімдерін таныстырды. Мәселен, Sandolo di Capri бренді итальяндық оңтүстіктің рухын бейнелейтін аяқ киімдерін ұсынды.
«Біз оны Capri деп атадық, себебі бұл атау Капри аралымен байланысты. 2008 жылы Жапонияға барған сапарымыздың арқасында жапондық серіктестер бренд үшін Capri атауын таңдады. Жапондардың түсінігінде Капри қазірдің өзінде жеке бренд болып саналады, сондықтан біз Sandolo di Capri атауын қолдануды шештік. Sandolo di Capri – өздігінен біздің өңіріміздің мәдениеті мен сұлулығының көрінісі», – деді компания өкілі Фабио Тезороне.
Оның айтуынша, басты міндет – өңірлік дәстүрлерді өздері жақсы меңгерген өндіріс арқылы заманауи өнімге айналдырып, оны бүкіл әлемге таныту.
Көрмеде инновациялар мен экологиялық тұрақтылыққа ерекше көңіл бөлінген. Ұйымдастырушылардың айтуынша, заманауи итальяндық тоқыма өндірісіне озық технологиялар енгізіліп келеді:
«Бұл сөмкенің ішінде цифрлық паспорт бар. Осылайша, осы өңірде өнім өндіретін компаниялар цифрлық қадағалау мен ақпаратты сақтауға ғана емес, табиғатқа жауапкершілікпен қарауға да инвестиция салып отыр. Бұл өз кезегінде осы бұйымдарды сатып алушылар үшін де маңызды. Өйткені олар осы өңірде жұмыс істейтін адамдардың қатысуымен қолмен жасалады».
Қазақстан мен Италия: стиль мен мәдениет арқылы жалғасқан берік достық
Италиямен мәдени және іскерлік байланыстарды белсенді қолдап жүрген танымал қазақстандық актер әрі продюсер Санжар Мәдиев көпжылдық ынтымақтастық туралы өз пікірін білдірді:
«Біз Қазақстандағы Италияның барлық өкілдіктерімен ынтымақтастық жасаймыз. Жыл сайын Венеция фестивальдеріне ұшып, Қазақстанның атынан қатысамын. Біз премиум костюмдер шығаратын Kiton компаниясымен жақын доспыз. Біз олардың зауытына бардық, олар бізді шақырып, яхтамен серуендетті. Dolce & Gabbana компаниясымен де доспыз. Сондықтан елшімен, Италиямен ынтымақтастығымыз өте жақын әрі бұрыннан келе жатыр».
Сәннің екі халықты жақындастырудағы рөлі туралы сұраққа Санжар Мәдиев:
«Әрине. Меніңше, қазір әлемде аутентті дүниелерге деген тапшылық бар. Ал біздің дизайнерлеріміз бен таланттарымыз итальяндық пішімдерді негізге алып, сонымен бірге өз дүниесін жасай алады. Айтқанымдай, біз Неапольдегі Kiton зауытында болдық, онда барлығы қолмен жасалады. Пиджак сатып алсаңыз, онда QR-код болады және оны сізге тіккен адамды таба аласыз. Мен серіктесімді осылай таптым. Пішуден бастап түймеге дейін барлығы қолмен жасалады. Сондықтан, біріншіден, оның бағасы мен сапасы осындай. Екіншіден, бастапқы сұраққа қайта оралсақ, меніңше, ақпарат та, сән де, осының бәріне қатысты дүниелер де бізде бар. Біздің талғамымыз жақсы», – деді.
ONER Corner кеңістігіндегі DESIGN CAMPANIA көрмесі 2026 жылғы 4 қазанға дейін жалғасады. Бағдарлама аясында жоба кураторы Джанлуиджи Рикуператидің модераторлығымен итальяндық кәсіпкерлермен ашық сұхбаттар, іскерлік нетворкинг-коктейльдер және Алматы мен Неаполь арасындағы әріптестікке арналған жаңа мүмкіндіктер ұсынылады.
Келесі материал: Гуйчжоуда ауылдың өзі көрмеге айналды: PhotoChina 19-шы рет Хунцзянда ашылды
Посмотреть эту публикацию в Instagram