28 қыркүйекте Гуйчжоу провинциясының Либо ауданындағы Хунцзян ауылында бірден екі оқиғаның шымылдығы түрілді. Бірі — 19 жылдық тарихы бар, Қытай ақпарат агенттігінің PhotoChina Original брендіне айналған «Түрлі-түсті Гуйчжоу – 2026» халықаралық табиғи орта фотокөрмесі. Екіншісі — тұңғыш рет қолға алынған «Жер өнері маусымы».
Провинцияның партия комитеті, China News Service және Мәдениет және туризм басқармасы бірігіп ұйымдастырған биылғы көрменің ұраны — «Гуйчжоудағы өмір: жарық пен көлеңкеде».
Бұл — көзқарастың өзгеруі. Бұрын объектив әдемі көрініс іздесе, биыл ол адамның жүзіне, алақанына, күнделікті күйбеңіне бұрылды. Желіде және көзбе-көз қойылған 1000-нан астам туынды алты арнаға бөлінген: мәдениет, саяхат, спорт, медицина, кәсіп және көлік. Бұл — Гуйчжоудың «келіп, суретке түсіп кету» деген туризмнен «келіп, қонып, өмір сүру» деген туризмге қалай өтіп жатқанының шежіресі.
Ал көрменің ең батыл шешімі — ауылдың өзінің ашық көрме алаңына айналуы.
Хунцзян кездейсоқ таңдалған жоқ. Бір жағы — ЮНЕСКО тізіміндегі «Кіші жеті үңгір» көркем қорығы, екінші жағы — буи халқының тастан қалап, жүздеген жыл сақтаған ескі үйлері. Осы орта — ең үлкен көрме залына айналды.
Мұнда есік қақпайсың, билет тексертпейсің. Ауылға кіре сала, әр үйдің қабырғасынан, әр ауланың шарбағынан, әр дәліздің көлеңкесінен фотосуреттер сөйлеп тұрады. Сабан төбенің астында — күріш террасаларының суреті, тас қабырғада — буи әжейінің күлкісі. Сырттан келген саяхатшы мен орақ ұстаған диқан бір туындының алдында қатар аялдап, үнсіз қалады. Сонда түсінетінің: бұл жерде адамның өзі — көріністің бір бөлігі.
Биылғы алаң халықаралық. Франция мен Италияны қоса алғанда, 10-ға жуық елдің фотосуретшілері өз Гуйчжоуын әкелген. Ал бағдарламаның жүрегі — «Жібек жолының ортақ сәулесі» атты арнайы шақырылған бөлім. Бұл — Қытай мен Орталық Азия арасындағы рухани көпірді жалғайтын үнсіз диалог.
Оны толықтырып тұрған — «Жер өнері маусымы». Тақырыбы — «Түрлі-түсті өмір, үйлесімдегі әсемдік». Балшықтан, ағаштан, сабаннан жасалған жер өнерінің нысандары егістіктің ортасына, өзеннің жағасына, үйдің төбесіне қонған. Қабырғасы жоқ, күзетшісі жоқ, шекарасы жоқ галерея.
Көрме Хунцзянда 31 желтоқсанға дейін жалғасады. Ұйымдастырушылар оның ізі бұнымен бітпейтінін айтады — көрме көшпелі сипатқа ие болып, Орталық Азия елдерінде де жалғасады.
Гуйчжоу өзінің сұлулығын енді ашықхатпен емес, адамның тағдырымен дәлелдегісі келеді.
Келесі материал: Қытай «Бэйдоу» навигациялық жүйесін қолдану аясын кеңейтуде