Моңғолияның Г. Дзанабазар атындағы Бейнелеу өнері музейінде Ресей Федерациясының еңбек сіңірген суретшісі, Моңғолияның ең жоғары мемлекеттік наградасы — «Полярная звезда» орденінің кавалері Федор Семенович Тороховтың «Монгольская палитра» атты көрмесі ашылды. Бұл туралы SteppeNews.kz asiarussia.ru сайтына сілтеме жасап хабарлайды.
Көрме Моңғолия мен Ресей арасында дипломатиялық қатынастардың орнағанына 105 жыл толуына орай ұйымдастырылды.
Шараны Ресейдің Алтай өлкесінің үкіметі, «Монголия–Россия» достық қоғамы, Моңғолия Суретшілер одағы және Ресейдің Моңғолиядағы елшілігі бірлесіп өткізді.
Көрменің ашылу рәсіміне Ресейдің Моңғолиядағы Төтенше және өкілетті елшісі Алексей Евсиков, Моңғолия мен Ресейдің Батыры Ж. Гуррагчаа және басқа да құрметті қонақтар қатысты.
Суретшінің Моңғолияға арналған туындылары
2005 жылы Федор Торохов Г. Дзанабазар атындағы Бейнелеу өнері музейінің қорына өзінің 68 туындысын сыйға тартқан.
Бұл — суретшінің Моңғолиядағы сегізінші жеке көрмесі. Оның бесеуі осы музеймен бірлесіп ұйымдастырылған.
Бұл жолы көрермен назарына суретшінің 1970 жылдардың басынан 2000 жылдардың басына дейінгі 30 жыл ішінде салған таңдаулы туындылары ұсынылды.
Федор Торохов Моңғолияны өзінің екінші отаны санаған. Оның шығармашылығы елдің табиғатын, халқын, тұрмыс-тіршілігі мен мәдениетін бейнелейтін көркем шежіреге айналды.
Экспозициядан Моңғолия табиғатының көріністерін, жергілікті тұрғындардың портреттерін, қарапайым халықтың тұрмысын бейнелейтін картиналарды көруге болады.
Музей өз қорындағы құнды жәдігерлер арқылы Моңғолияның ғана емес, шетел мемлекеттерінің өнері, мәдениеті мен тарихын да көпшілікке таныстырып келеді. Оның негізгі бағыттарының бірі — мәдениетаралық байланыстар мен өнердің тарихи дамуы туралы білімді насихаттау.
Келесі материал: Қазақстан климаттық жобаларға $4 млн-нан астам инвестиция тартуы мүмкін