V Азия Пара ойындарының бесінші жарыс күнінде Қазақстан ұлттық құрамасының спортшылары пара дзюдо, пара велоспорт, пара садақ ату, пара жеңіл атлетика, пара жүзу, пара пауэрлифтинг, пара таеквондо, пара үстел теннисі және отырып ойнайтын волейболдан сынға түсті. Бұл туралы SteppeNews.kz ҚР Туризм және спорт министрлігіне сілтеме жасай отырып хабарлайды.
Жарыс күнінің қорытындысы бойынша қазақстандық спортшылар 16 медаль жеңіп алды. Осылайша, ұлттық құраманың жалпы жүлде саны 37-ге жетті. Оның ішінде 10 алтын, 11 күміс және 16 қола медаль бар.
Пара дзюдо: Қазақстан қоржынына сегіз медаль түсті
Пара дзюдодан Қазақстан құрамасы үш алтын, бір күміс және төрт қола медаль иеленді.
J2 класында +95 келі салмақ дәрежесінде финалға шыққан Жұрқамырза Шүкірбеков Иран спортшысын жеңіп, алтын медаль алды. J1 класында +70 келі салмақта өнер көрсеткен Ақтолқын Сейілбекова төрт қарсыласын да жеңіп, жарыс чемпионы атанды. J2 класында +70 келі салмақта белдескен Зарина Райфова да барлық төрт қарсыласынан басым түсіп, алтын жүлдеге қол жеткізді.
J2 класында 95 келіге дейінгі салмақта сынға түскен Жанбота Аманжол күміс медаль иеленді. Қола жүлдеге Ермек Нұрқабаев, Ерлан Өтепов, Бағланбек Оңалбек және Аяла Мереке ие болды. Аяла Мереке қола медаль үшін өткен белдесуде Үндістан спортшысын жеңді.
Пара велоспорт: екі алтын және бір күміс
Қазақстандық спортшылар пара велоспорттан үш медаль жеңіп алды. Ерлер арасындағы B класында 20 шақырымдық жеке уақытқа жарысуда Наиль Ермуханбет пен оның пилоты Руслан Алиев 34 минут 09,17 секунд нәтижемен мәреге бірінші болып жетті.
Осы санаттағы жарыста Кирилл Илюкевич пен оның пилоты Глеб Брусенский 35 минут 26,64 секунд көрсеткішпен күміс медаль иеленді.
Әйелдер арасындағы B класында Анастасия Калаус пен оның пилоты Полина Братчикова 32 минут 21,54 секунд нәтижемен алтын жүлдеге қол жеткізді. Өзбекстан спортшылары 32 минут 45,82 секундпен екінші орын алса, Сингапур өкілдері 34 минут 31,92 секунд нәтижемен үшінші орынға тұрақтады.
Қазақстан пара садақ атудан алғашқы медалін жеңіп алды
Қазақстан құрамасы Азия Пара ойындарында алғаш рет пара садақ атудан жүлдегер атанды.
Ерлер арасындағы W1 класының жұптық сайысында Темірлан Сейітқамал мен Нұршат Төлеуқасым финалда Қытай құрамасымен кездесті. Шешуші бәсекеде қытайлық спортшылар 6:0 есебімен жеңіске жетті. Нәтижесінде қазақстандық садақшылар күміс медаль иеленді.
Финалдың үш сеті де Қытай құрамасының пайдасына аяқталды. Есеп — 37:31, 35:32 және 37:35.
Пара жеңіл атлетика: екі жүлде және Азия рекорды
Пара жеңіл атлетикадан Ислам Салимов пен Махамбет Серікқалиев жүлдегерлер қатарынан көрінді.
T13 класында ұзындыққа секіруден Ислам Салимов 6,30 метр нәтижемен күміс медаль алды. Жапониялық Рёта Фунагага 6,93 метр көрсеткішпен алтын жүлдеге ие болса, Өзбекстан өкілі Батыр Мұхамедов 6,24 метр нәтижемен қола медаль жеңіп алды.
F53 класында ядро итеруден Махамбет Серікқалиев 6,81 метрге қол жеткізіп, қола жүлдегер атанды. Ол осы нәтижесімен жеке рекордын жаңартты. Бұл сайыста Үндістан спортшысы А. Верма 8,16 метрмен алтын, Иран өкілі А. Хемами 8,09 метрмен күміс медаль алды.
Басқа жарыстарда F11 класында диск лақтырған Светлана Иржанова алтыншы орынға тұрақтады. F46 класында ядро итеруден Равиль Мансурбаев төртінші орын алса, F55 класында найза лақтырудан Мұқан Айтмырзаев бесінші орынға жайғасты.
Ал T62 класында 100 метрге жүгірген Айсұлу Сүлейменова 16,18 секунд нәтижемен Азия рекордын орнатты.
Пара жүзу: екі медаль
Қазақстандық жүзушілер жарыс күнінде күміс және қола медаль жеңіп алды.
SB4 санатында 100 метрге брасс әдісімен жүзген Әли Тұрғанбеков 1 минут 44,26 секунд нәтиже көрсетіп, күміс жүлдегер атанды.
S10 санатында 100 метрге баттерфляй әдісімен жүзген Диас Кенжебек 1 минут 05,50 секунд нәтижемен қола медаль иеленді.
Басқа қазақстандық жүзушілер де бірнеше қашықтықта сынға түсті. S8 санатында 100 метрге еркін стильде жүзген Алина Дубинина 1 минут 23,69 секунд нәтижемен бесінші орын алды. Әйелдер арасындағы осы санаттың 50 метрлік сайысында ол 38,20 секунд көрсеткішпен тағы да бесінші орынға тұрақтады.
SB11 санатында 100 метрге брасс әдісімен жүзуде Роман Потапов 1 минут 20,89 секунд нәтижемен төртінші, Әмір Мұратбеков 1 минут 22,25 секундпен бесінші орын алды.
S5 санатында 200 метрге еркін стильде жүзген Айсултан Күлкаев 3 минут 14,40 секунд көрсеткішпен бесінші орынға жайғасты. SB5 санатындағы 100 метрге брасс әдісімен жүзуде әйелдер арасында Зарина Мурзагалиева 2 минут 30,80 секунд нәтижемен жетінші орын алды. Ерлер арасында осы қашықтықта Бекасыл Қасымбек 2 минут 07,44 секунд көрсеткішпен бесінші болды.
SM11 санатында 200 метрге кешенді жүзуден Нұрдәулет Дүйсенбаев 2 минут 53,94 секунд нәтижемен бесінші орын иеленді.
Пара пауэрлифтинг: қазақстандықтар үздік бестікке енді
Пара пауэрлифтингтен Қазақстан спортшылары жүлделі орындарға жақын нәтижелер көрсетті.
Әйелдер арасында 73 келіге дейінгі салмақта Раушан Қойшыбаева 113 келі көтеріп, төртінші орын алды.
Ерлер арасында 88 келіге дейінгі салмақта Рахметжан Хамаев 206 келі нәтижемен бесінші орынға тұрақтады. 97 келіге дейінгі салмақта Әділжан Баутов 204 келі көтеріп, бесінші орын иеленді. Осы салмақта сынға түскен Асхат Жұманов 180 келі нәтижемен сегізінші орынға жайғасты.
Пара таеквондо: қазақстандықтар жүлдеге таласты
K44 класының 80 келіге дейінгі салмағында өнер көрсеткен Нұрлан Домбаев алғашқы жекпе-жегінде жапониялық Чикара Итоды жеңіп, жартылай финалға өтті. Алайда жартылай финалда Оңтүстік Корея өкілі Чжу Чонхымге 0:2 есебімен есе жіберді. Қола медаль үшін өткен жекпе-жекте де қарсыласына жол берді.
K44 класының +80 келі салмағында сынға түскен Жанболат Казиев жұбаныш жекпе-жегінде Ирак спортшысы Шад Хошнавқа 2:1 есебімен жол берді. Ал +65 келі салмақта өнер көрсеткен Айкенже Дәулетшина жұбаныш кездесуінде Иран өкілінен жеңіліп, жарысты аяқтады.
Отырып ойнайтын волейбол: Қазақстан Иранға есе жіберді
Волейболдан Қазақстан құрамасы топтық кезеңде Иран командасымен кездесті. Ойын қорытындысы бойынша қазақстандықтар 0:3 есебімен жеңілді.
Бұған дейін ұлттық құрама Таиланд командасымен кездесіп, Азия Пара ойындарындағы алғашқы жеңісіне қол жеткізген еді.
Пара үстел теннисі: қазақстандық жұптар бірнеше кездесу өткізді
Пара үстел теннисінен Қазақстан өкілдері жұптық және аралас жұптық сайыстарда бақ сынады.
Әйелдер арасындағы жұптық сында Аружан Ғиниятова мен Раушан Орынбаева Гонконг спортшыларына 0:3 есебімен есе жіберді. Ал Алтынай Ержанқызы мен Балзия Таш Жапония өкілдерінен 1:3 есебімен жеңілді.
Аралас жұптық сайыста Әли Махулбеков пен Балзия Таш Жапония құрамасына 0:3 есебімен жол берді. Раушан Орынбаева мен Игорь Худяков Оңтүстік Кореядан 1:3, Қытайдан 0:3 есебімен жеңілді. Әли Махулбеков пен Балзия Таш Индонезия жұбынан 0:3 есебімен ұтылды.
Аружан Ғиниятова мен Азамат Оразбек Таиланд спортшыларына 0:3 есебімен есе жіберіп, Гонконг өкілдерімен кездесуде 2:3 есебімен жеңілді. Ардақ Нұрмағамбетов пен Александра Степанова Жапония жұбынан 1:3, Оңтүстік Корея жұбынан 0:3 есебімен ұтылды.
Марат Суртубаев пен Алтынай Ержанқызы Қытай спортшыларына 1:3 есебімен есе жібергенімен, Индонезия жұбын 3:1, Жапония өкілдерін 3:2 есебімен жеңді.
Ерлер арасындағы жұптық сында Марат Суртубаев пен Талғат Ерекеев Гонконг спортшыларына 1:3 есебімен жол берді. Игорь Худяков пен Азамат Оразбек Қытай құрамасынан 0:3, Филиппин өкілдерінен 1:3 есебімен жеңілді.
V Азия Пара ойындарының бесінші жарыс күнінен кейін Қазақстан құрамасының еншісінде 37 медаль бар. Оның ішінде 10 алтын, 11 күміс және 16 қола жүлде бар.
Келесі материал: Манас Қырғызстанның екінші экономикалық орталығына айналады