Қытайдың Бейжің қаласында 13–15 қараша аралығында 120-дан астам елдің өкілдері қатысқан Дүниежүзілік қытай тілі конференциясы өтті. Халықаралық жиынға Тәжікстанның жоғары оқу орындарының делегациялары, соның ішінде Тәжік ұлттық университеті, Данғара мемлекеттік университеті және Тәжік тау-металлургия институтының өкілдері қатысты. Бұл туралы «Ховар» ұлттық ақпарат агенттігі хабарлады деп жазады, SteppeNews.kz.
Конференция қытай тілін оқыту, білім беру тәжірибесімен алмасу және халықаралық академиялық ынтымақтастықты кеңейту мәселелеріне арналды.
Тәжікстан мен Қытай арасындағы стратегиялық әріптестік аясында екі елдің жоғары оқу орындары арасындағы байланыс нығайып келеді. Бұл ынтымақтастық мамандар даярлау сапасын арттыруға, тіл үйрену мүмкіндіктерін кеңейтуге және ғылыми-білім беру байланыстарын дамытуға бағытталған.
Конференция барысында Тәжік ұлттық университетінің Конфуций институты «Үздік тіл үйрену орталығы» сертификатына ие болды. Марапат оқу орнының қытай тілін оқытуға, шет тілдерін меңгерген мамандар даярлауға және Тәжікстан мен Қытай арасындағы білім беру байланыстарын дамытуға қосқан үлесін мойындау ретінде берілді.
Сонымен қатар Данғара мемлекеттік университетіне Конфуций институтының құрылғанына байланысты құрылтайшылық сертификат табысталды.
Бұл жетістіктер екі ел арасындағы білім беру ынтымақтастығын кеңейтуге, жоғары білікті мамандар даярлауға және халықтар арасындағы достық байланыстарды нығайтуға бағытталған.
Келесі материал: Астанада Kaztraffic-2026 халықаралық жол көрмесі өтеді
