Алматыда ұялы байланыс пен интернет жоқ аумақтарда адамның орналасқан жерін анықтауға мүмкіндік беретін AG Tag қауіпсіздік жүйесі сынақтан өткізіліп жатыр. Арнайы құрылғы тауда адасып кеткен немесе көмекке мұқтаж адамдарды іздеу жұмыстарын жеңілдетуге бағытталған. Бұл туралы SteppeNews.kz Алматы қаласының әкімдігіне сілтеме жасай отырып хабарлайды.
Жобаны AG Digital KZ компаниясы Алматы қаласының Цифрландыру басқармасының қатысуымен жүзеге асыруда.
Құтқару қызметтерінің мәліметінше, жыл сайын Алматы тауларында 1 000-нан астам іздестіру-құтқару жұмысы жүргізіледі. Алайда көптеген таулы бағытта ұялы байланыс желісі жоқ. Мұндай жағдайда көмекке мұқтаж адамның нақты орналасқан жерін анықтау қиынға соғады.
AG Tag құрылғысы спутниктік навигация арқылы адамның координаттарын анықтап, радиобайланыс көмегімен құтқару қызметінің базалық станциясына жібереді. Орналасқан жер туралы деректер әр екі секунд сайын жаңартылып отырады. Төтенше жағдай кезінде адам құрылғыдағы арнайы батырманы бір рет басып, дабыл белгісін жібере алады. Құтқарушылар оның координаттарын электрондық картадан көре алады.
Қазіргі конфигурацияда құрылғы сигналы 15 шақырымға дейін таралады. Сонымен қатар жүйе құрылғымен байланысты бақылап, сигнал жоғалған жағдайда оның соңғы тіркелген орнын сақтайды. Базалық станция интернет пен ұялы байланыс желісіне қосылмай-ақ автономды жұмыс істей алады.
Жоба аясында құрылғыларды азаматтарға eGov Mobile қосымшасындағы QR-код арқылы беру тетігі де қарастырылған. Сапар алдында пайдаланушы баратын бағыты мен болжамды қайту уақытын тіркеп, құрылғыны ала алады. Сапар аяқталғаннан кейін оны арнайы пунктке қайтарады.
Алматының негізгі таулы бағыттарында осындай жабдықтарды беретін 12 пункт ашу жоспарланған. Олардың қатарында Алма-Арасан, Аюсай, Медеу, Кімасар, Көкжайлау, Бұтақты және Шымбұлақ бар.
Қазіргі уақытта жүйе Алматының алты таулы бағытында сынақтан өткен. Олардың арасында Турист, Панорама, Букреев және Фурманов шыңдары, сондай-ақ Үлкен Алматы көлі маңы бар. Тексерулер әртүрлі ауа райы жағдайында, соның ішінде биік таулы аумақтарда жүргізілді.
Сонымен қатар Алматы қаласының Құтқару қызметі және ҚР ТЖМ Республикалық жедел-құтқару жасағымен бірлескен сынақтар ұйымдастырылды. Ұялы байланыс жоқ аумақтарда жүргізілген тексерулер жүйенің жұмыс қабілетін растаған. Қазір келесі кезеңдегі сынақтарға арналған құрылғылардың алғашқы партиясы дайындалды.
2026 жылдың соңына дейін Алматы тұрғындары мен альпинистік қауымдастық өкілдерінің қатысуымен пилоттық сынақтарды бастау жоспарланып отыр. Оған Алматы қаласының Төтенше жағдайлар департаменті, Альпинизм федерациясы және қалалық визит-орталықтар қатысады.
Алдағы уақытта AG Tag технологиясын Алматы тауларынан бөлек, Қазақстанның өзге де туристік аймақтары мен жетуі қиын өңірлерінде пайдалану көзделген.
Келесі материал: Астанада туризм және қонақжайлылық саласына кадр даярлаудың халықаралық тәжірибесі талқыланды