Моңғолия астанасы Ұлан-Батыр қаласының орталығында, Мемлекеттік сарайдың жанында елдің мемлекеттік мөріне арналған монументті қалпына келтіру жұмыстары жүргізіліп жатыр. 2006 жылы Ұлы Моңғол империясының құрылғанына 800 жыл толуына орай орнатылған ескерткіш ел мемлекеттілігінің тарихын бейнелейтін маңызды нысандардың бірі саналады. Бұл туралы SteppeNews.kz Монголия сейчас ақпараттық агенттігіне сілтеме жасап хабарлайды.
Монумент авторы, суретші Д. Наранжав тарихи ескерткіш арқылы Моңғолияның бірнеше дәуірін көрсеткен. Оның төрт қырында Шыңғыс хан құрған қуатты империядан бастап, 1924 және 1992 жылдардағы Конституциялар негізінде бекітілген мемлекеттік мөрлерге дейінгі тарихи кезеңдер бейнеленген. Осылайша, ескерткішке көз салған адам ел мемлекеттілігінің қалыптасу жолы мен тарихи сабақтастығын көре алады.
Алайда уақыт пен табиғи жағдайлардың әсерінен монументтің тұғыры тозған. 2006 жылы орнатылғаннан бері оның іргетасына жөндеу жұмыстары жүргізілмеген. Қазір тарихи нысанды сақтап қалу мақсатында оны нығайту шаралары қолға алынған. Жұмыс барысында ескі іргетас алынып, орнына берік табиғи граниттен жаңа негіз қалануда. Ал тұғырға қола мемлекеттік мөр орнатылады.
Қалпына келтіру жұмыстарын 2026 жылғы 15 қарашаға дейін аяқтау жоспарланған. Елорданың Қала құрылысы департаменті жүзеге асырып жатқан жоба монументтің негізін нығайтумен қатар, оның тарихи маңызын келер ұрпаққа жеткізуді көздейді. Ескерткіш Шыңғыс ханға және мемлекеттік рәсімдерге арналған сәулеттік кешеннің құрамына кіреді.
Монументтің тарихи мазмұны мұнымен шектелмейді. Оның негізіне Моңғолияның түрлі тайпаларына тиесілі 168 мөр қашалған. Ал алдыңғы бетінде Ұлы Моңғол далай ханы Гүйдің мөрі бейнеленген. Осы ерекшеліктері арқылы ескерткіш елдің мемлекеттілік тарихын ғана емес, бай мәдени мұрасын да танытады.
Келесі материал: Қағаздағы суреттен 3D-голограммаға: Алматыда бүлдіршіндер жасанды интеллект мүмкіндігін таныды