Халықаралық уақытты үйлестіру жүйесі өзгеріске дайындалып жатыр: 2027 жылдың 20 мамырынан бастап Дүниежүзілік үйлестірілген уақытты (UTC) кібісе секундтардың көмегімен түзетуден кезең-кезеңімен бас тарту басталады. Бұл шешім сағаттардың дәл синхрондалуына тәуелді жүйелердің тұрақтылығын арттыруға бағытталған, деп хабарлайды SteppeNews.kz румынның Adevarul басылымына сілтеме жасап.
Тиісті шешім Версальде өткен Өлшемдер мен таразылар жөніндегі бас конференцияда қабылданды.
UTC бүкіл әлемде бірыңғай уақыт стандарты ретінде қолданылады. Ол өте жоғары дәлдікті қамтамасыз ететін атомдық сағаттар негізінде есептеледі. Ал астрономдар анықтайтын уақыт Жердің айналу жылдамдығына тәуелді, бірақ бұл жылдамдық тұрақты емес. Осыған байланысты екі жүйе арасында біртіндеп айырмашылық пайда болады.
Бұл алшақтықты жою үшін 1972 жылы кібісе секундтар механизмі енгізілді. Содан бері мұндай 27 түзету жүргізілді. Соңғы рет бұл өзгеріс 2016 жылдың соңында жасалған болатын. Нәтижесінде әдеттегі 60 секундтың орнына жекелеген минут 61 секундқа созылды.
Көптеген адамдар бұл өзгерісті байқамағанымен, қосымша секундтар цифрлық инфрақұрылымға қиындықтар тудыруы мүмкін. Уақытты дұрыс өңдеу телекоммуникациялар, спутниктік навигация, энергетикалық желілер, интернет-сервистер және компьютерлік жүйелер үшін үлкен маңызға ие. Бұрын кібісе секундтарды қосу кейбір платформалардың жұмысында техникалық ақаулардың туындауына әкеп соқтырған еді.
Секундтарды кезең-кезеңімен қосудан бас тарту синхрондауды жеңілдетіп, осындай қателердің қаупін азайтады. Дегенмен атомдық және астрономиялық уақыт арасындағы айырмашылық біртіндеп арта түседі. Басылымда сипатталған сценарийге сәйкес, болашақта бұл айырмашылық 3600 секундқа, яғни бір сағатқа жетуі мүмкін.
Өзгерістер қарапайым қолданушыларға қалай әсер етеді?
Күнделікті өмірде қолданушылар смартфондар, компьютерлер мен қарапайым сағаттардың жұмысында ешқандай өзгерісті байқамауы тиіс. Бұл шешім уақытты көрсетудің әдеттегі тәртібінің күшін жоюды білдірмейді және жазғы немесе қысқы уақытқа ауысумен байланысты емес.
Негізгі салдары өлшеудің ерекше жоғары дәлдігін талап ететін кәсіби салалар үшін маңызды болмақ. Оларға астрономия, геодезия және спутниктік технологиялардың жекелеген түрлері жатады.
Осылайша, кібісе секундтардан бас тарту адамдардың күнделікті тіршілігіне емес, ең алдымен техникалық стандарттар мен уақытты синхрондау инфрақұрылымына қатысты болып отыр.
Редакция ескертпесі: кібісе секундтардан бас тарту туралы шешім 2027 жылдың 20 мамырында телефондар мен сағаттардағы уақыт өзгереді дегенді білдірмейді. Мұнда уақытты өлшеу мен келісудің халықаралық стандарты туралы айтылып отыр.
Келесі материал: Түркия 1 қарашадан бастап 15 жасқа дейінгі балаларға әлеуметтік желілерге шектеу қояды