«Кино сценарийіндей»: Air Canada ұшқышы 17 жыл бойы тиісті лицензиясыз ұшып келген

Канада билігі елдегі ең ірі әуе компаниясы Air Canada-ның бұрынғы ұшқышына қатысты қылмыстық іс қозғады. Ол қажетті капитандық куәлігі болмаса да, 17 жыл бойы жүздеген рейсті басқарып келген. Оқиға желісін құқық қорғау органдары «кино сценарийіне» теңеді, деп хабарлайды SteppeNews.kz The New York Times — қа сілтеме жасап.

Онтарио провинциясының Пил аймақтық полициясы Торонто Пирсон халықаралық әуежайында қызмет еткен 59 жастағы Джефф Уоллға (Geoff Wall) қатысты ресми айып тақты. Оған 5000 доллардан асатын көлемдегі алаяқтық, құжаттарды қолдан жасау және қоғамдық тәртіпті бұрмалау сияқты жалпы жеті бап бойынша айып тағылып отыр.

Оқиғаның мән-жайы

Полиция мен транспорттық бақылау мекемелерінің мәліметінше, Барри (Онтарио) қаласының тұрғыны Джефф Уолл 2009 бен 2025 жылдар аралығында капитан ретінде 900-ге жуық әуе рейсін жүзеге асырған.

Әрине, Уолл мырзаның авиация саласында белгілі бір рұқсат қағаздары болған. Бірақ оның ішінде Канаданың Көлік министрлігі (Transport Canada) беретін, әуе кемесінің капитаны болып қызмет етуге міндетті Airline Transport Pilot License (ATPL) лицензиясы мүлдем болмаған.

«Бұл жағдай отбасылық дәрігерлік лицензиясы бар маманның өзінің жеке кабинетінде миға күрделі операция жасап жүргенімен бірдей», — деді Пил аймақтық полициясы бастығының орынбасары Ник Милинович.

Тексеріс қалай басталды?

Тәртіп сақшыларының айтуынша, Джефф Уолл тергеу басталмай тұрып, өткен жылы өз еркімен зейнетке шығып үлгерген. Алайда, оның заңсыз әрекеті 2025 жылдың наурыз айында Торонто Пирсон әуежайында өткен кезекті жоспарлы тексеріс кезінде әшкере болды. Ұшқыштың ұсынған күмәнді құжаттары бақылаушылардың күдігін тудырып, «Икар жобасы» (Project Icarus) деп аталған ауқымды қылмыстық тергеудің басталуына түрткі болды.

Қазіргі уақытта Transport Canada мекемесі ішкі тексеріс жүргізіп, айыппұлдар салғанын хабарлады. Істің қалған детальдары мен қауіпсіздік хаттамаларының қалай бұзылғаны бойынша тергеу амалдары жүргізілді.