Анкарада 10–11 қазан күндері Анадолы антикварлары қауымдастығының ұйымдастыруымен «Антиквариат күндері» өтеді. Іс-шара коллекционерлер мен көне бұйымдарға қызығушылық танытатындарды бір алаңға жинайды. Көрмеде сирек кездесетін және тарихи маңызы бар түрлі бұйымдар ұсынылады. Бұл туралы SteppeNews.kz Mk-turkey.ru сайтына сілтеме жасап хабарлайды.
Іс-шара Анкарадағы Kuzu Effect сауда орталығында ұйымдастырылады. Келушілер антиквариат жәрмеңкелерінде көпшілікке жиі ұсыныла бермейтін заттарды көре алады. Олардың қатарында қолдан тоқылған көне кілемдер, сирек граммофондар, медальдар және Осман кезеңіне тиесілі мыс бұйымдар бар.
Анадолы антикварлары қауымдастығының президенті Шюкрю Сарының айтуынша, қауымдастық Айранджи ауданында антиквариат жәрмеңкесін 22 жылдан бері ұйымдастырып келеді.
Оның сөзінше, бұған дейін жәрмеңке әр айдың бірінші жексенбісінде өткізілген. Алайда келушілердің қызығушылығы артқан соң, іс-шара айына екі рет – бірінші және соңғы жексенбі күндері ұйымдастырылатын болған.
Сары Анкарадағы антиквариат жәрмеңкелеріне қызығушылық жоғары екенін атап өтті. Оның айтуынша, Айранджи ауданындағы антиквариат жәрмеңкесіне күн сайын шамамен 5 мың адам келеді.
«Сұраныстың жоғары екенін ескере отырып, іс-шараны кеңірек алаңда ұзақ уақыт өткізу туралы шешім қабылдадық. Антиквариат әуесқойларына әдетте жәрмеңкелерде ұсыныла бермейтін қолдан тоқылған көне кілемдер, сирек граммофондар, медальдар және Осман кезеңіне тиесілі мыс бұйымдарды ұсынамыз», – деді Шюкрю Сары.
Зерттеуші, жазушы әрі антиквар Некати Доган іс-шара коллекция жинау мәдениеті мен антиквариатқа деген қызығушылықты арттыруға ықпал ететінін айтты.
Оның сөзінше, көне бұйымдарға деген қызығушылық артып келеді.
«Антиквариат өткен мен болашақты байланыстыратын көпір іспетті. Антиквариат жәрмеңкелері жастарға күнделікті өмірде кездеспейтін көптеген бұйымды көруге мүмкіндік береді. Жастар монеталарға, медальдарға, төсбелгілерге және ақ-қара фотосуреттерге қызығушылық танытады. Олардың антиквариат пен көне заттарға деген қызығушылығы қуантады», – деді Некати Доган.
Айранджи антиквариат жәрмеңкесінің сатушысы Хасан Ышық та көне бұйымдарға сұраныстың жоғары екенін атап өтті. Ол 15 жылдан бері антиквариат пен тарихи заттарды сатып, сатумен айналысады.
Оның айтуынша, біреулер үшін антиквариат – хобби болса, енді бірі көне бұйымдарды қызығушылықпен жинайды. Сонымен қатар жастар арасында да тарихи заттарға деген қызығушылық артып келеді.
Келесі материал: Қазақстан мен ДДҰ Арал өңірі тұрғындарының денсаулығын қорғау үшін күш біріктіреді