Қытайда технологиялық компаниялар мен өндіріс орындарына арнайы экскурсия ұйымдастыруға шетелдік инвесторлар мен кәсіпкерлердің қызығушылығы артып келеді. Елдегі робототехника, жасанды интеллект, электромобиль және аккумулятор өндірісі туристік бағыттардың біріне айналып отыр, деп хабарлайды SteppeNews.kz Reuters — ке сілтеме жасап.
Соңғы жылдары Қытайға келетін шетелдік қонақтардың арасында елдің технологиялық және өндірістік мүмкіндіктерімен танысуды мақсат ететіндердің саны көбейген. Инвесторлар, кәсіпкерлер және технологиялық компаниялардың басшылары зауыттарға барып, өндіріс процестерін тікелей көруге мүмкіндік беретін арнайы турларға қатысады.
Мұндай сапарлардың басты мақсаты – Қытайдағы жаңа технологиялардың қалай әзірленіп, өндірісте қолданылатынын тәжірибе жүзінде көру. Әсіресе адам тәрізді роботтар, жасанды интеллект жүйелері, электромобильдер мен аккумуляторлар шығаратын кәсіпорындарға қызығушылық жоғары.
Reuters мәліметінше, Шанхайдағы зерттеу компаниясының басшысы Роберт Ву инвесторлар, кәсіпкерлер және компания жетекшілерінен құралған екі топқа осындай сапар ұйымдастырған. Бес күндік бағдарламаның құны 15 мың долларға дейін жеткен. Қатысушылардың шамамен жартысы Оңтүстік-Шығыс Азия елдерінен келген.
Өндіріс орындары туристік нысанға айналып келеді
Қытайда технологиялық турлармен қатар жалпы өндірістік туризм де қарқын алып отыр. Мемлекеттік ақпарат құралдарының мәліметіне сәйкес, 2025 жылы елдегі өндірістік туризм нарығы 17,8 млрд доллар кіріс әкелген. Ал 2029 жылға қарай бұл көрсеткіш 300 млрд юаньнан, яғни шамамен 44,6 млрд доллардан асуы мүмкін.
Шанхайдағы технологиялық компанияларға арналған турларды ұйымдастыратын Glopen агенттігі 2026 жылы сұраныстың 50 пайызға артқанын хабарлаған. Компания негізінен Еуропа мен Сингапурдан келген клиенттермен жұмыс істейді және ай сайын 100-ден астам корпоративтік біркүндік экскурсия өткізеді.
Қытай билігі де өндірістік туризмді дамытуға мән беріп отыр. Елде туристерге ашық 140-тан астам ресми өндірістік демонстрациялық алаң бар. Бірқатар зауыттар экскурсиялық бағдарламалар ұсынып, келушілерге өндіріс барысымен танысуға мүмкіндік береді.
Xiaomi зауытына қызығушылық жоғары
Технологиялық туризмнің танымал бағыттарының бірі – электромобиль өндірісі.
Мәселен, Xiaomi компаниясының электромобиль шығаратын зауыты 2024 жылғы наурыздан бері 250 мыңнан астам адамды қабылдаған. Кәсіпорынға бару үшін орындар онлайн лотерея арқылы бөлінеді.
Туристік бағдарламалар Пекин, Шэньчжэнь, Шанхай, Ханчжоу және Хэфэй сияқты Қытайдың ірі технологиялық орталықтарын қамтиды. Бұл қалаларда электромобиль, аккумулятор, жасанды интеллект және робототехника бағытындағы ірі өндірістер шоғырланған.
Шэньчжэнь – технологиялық туризмнің жаңа орталығы
Бұл үрдістің ең айқын мысалдарының бірі – Шэньчжэнь қаласы. Қытайдың оңтүстігінде орналасқан қала технологиялық және өндірістік инновацияларымен танымал.
2025 жылы Шэньчжэньге келген шетелдік туристер саны 70 пайызға артқан. 2026 жылдың алғашқы тоқсанында да бұл көрсеткіш 30 пайыздан астам өскен. Тамыз айындағы мәлімет бойынша қалада 5 миллионнан астам келу тіркелген.
Шэньчжэньде шетелдік кәсіпкерлерге арналған технологиялық көрмелер, өндірістік экскурсиялар және кәсіби кездесулер ұйымдастырылады. Қалада робототехника мен жасанды интеллект саласында жұмыс істейтін кәсіпкерлерге арналған арнайы жұмыс және тұру кеңістіктері де пайда болуда.
Осылайша, Қытайдағы туризмнің жаңа бағыты елдің табиғи немесе тарихи көрікті жерлерімен ғана шектелмейтінін көрсетіп отыр. Технология мен өндіріс те саяхатшылар үшін қызықты нысанға айналып келеді.
Мұндай тәжірибе туристерге заманауи өндірісті сырттай бақылап қана қоймай, жаңа технологиялардың күнделікті өмірде қалай қолданылып жатқанын жақыннан көруге мүмкіндік береді. Ал Қытай үшін бұл елдің технологиялық және өндірістік әлеуетін таныстырудың жаңа тәсіліне айналып отыр.
Келесі материал: Көшпенділер ойындарындағы медальдық есеп қайта қаралып, Қазақстан көш бастады