Өзбекстан мен Оңтүстік Корея Хиуа қаласындағы тарихи Ичан-Кала мемлекеттік музей-қорығында туристік ағынды жасанды интеллект технологиялары арқылы басқару жобасын жүзеге асыруды жоспарлап отыр деп хабарлайды SteppeNews.kz Өзбекстан Республикасының Туризм комитетіне сілтеме жасай отырып.
Бұл мәселе Өзбекстан Туризм комитеті төрағасының орынбасары С. Бобокалонов пен Корея туристік ұйымының (Korea Tourism Organization, KTO) Халықаралық ынтымақтастық департаментінің директоры Мин Джи Ён арасындағы кездесуде талқыланды.
Жоба KOPIST халықаралық бағдарламасы аясында жүзеге асырылады. Бағдарлама Оңтүстік Кореяның Мәдениет, спорт және туризм министрлігінің бастамасымен қолға алынған және оны Корея туристік ұйымы жүзеге асырады. Оның негізгі мақсаты – тұрақты туризм саласындағы халықаралық ынтымақтастықты дамыту және перспективалы жобаларды қаржыландыруға дайындау.
Биыл мамыр айында Өзбекстан өкілдері Кореяда өткен туристік саясат мәселелеріне арналған жоғары деңгейдегі форумға қатысты. Ал маусым айында 10 елдің өкілдері қатысқан байқауда Өзбекстан ұсынған «Ичан-Каладағы туристік ағынды жасанды интеллект технологиялары арқылы басқару» жобасы бірінші орын алды.
Осыған байланысты Өзбекстан үшін Global Intensive Consulting бағдарламасы ұйымдастырылып отыр.
Жобаның басты мақсаты – Ичан-Каладағы туристік ағынды нақты уақыт режимінде бақылау және басқару жүйесін енгізу, туристік инфрақұрылымды цифрландыру және жергілікті мамандардың кәсіби әлеуетін арттыру.
Жоба аясында жасанды интеллект негізінде жұмыс істейтін датчиктер мен талдау жүйесін енгізу жоспарланған. Сонымен қатар тарихи ескерткіштерге физикалық әсер етпейтін интеллектуалды навигациялық көрсеткіштер орнатылып, орталық көшені айналып өтетін қосымша туристік бағыттар әзірленеді.
Қолөнершілер мен музей-қорық қызметкерлеріне арналған арнайы оқыту бағдарламаларын өткізу де көзделіп отыр.
Үргеніш халықаралық әуежайының кеңеюі және теміржол қатынасының жақсаруы Хиуаға келетін туристер санының артуына ықпал етеді деп күтілуде. Осыған байланысты Ичан-Каладағы туристік ағынды тиімді басқаруға мүмкіндік беретін заманауи технологиялық жүйені енгізу өзекті болмақ.
Жоба жүзеге асқан жағдайда туристер санын көбейте отырып, тарихи-мәдени мұраны сақтауға, олардың Хиуада болу мерзімін ұзартуға және туризмнен түсетін экономикалық пайданы жергілікті тұрғындар арасында кеңірек бөлуге мүмкіндік береді.