Аданадағы «Ақ жартастар» парапланшылардың жаңа бағытына айналды
Түркияның Адана провинциясындағы Қараташ ауданында орналасқан Харбиштің тік борлы жартастары парапланмен ұшуды ұнататындардың жаңа бағытына айналып келеді. Дуврдағы әйгілі Ақ жартастарға ұқсайтын табиғи нысан Жерорта теңізі жағалауымен ұшуды қалайтын туристерді қызықтыруда деп хабарлайды SteppeNews.kz Mk-turkey.ru ақпараттық сайтына сілтеме жасай отырып.
Жартастар аудан орталығынан шамамен 3 шақырым жерде орналасқан. Жерорта теңізі жағалауынан 40 метрге жуық биіктікте тұрған бұл мекен өңірдегі ең көрікті табиғи орындардың бірі саналады. Мұнда парапланшылардан бөлек, фотографтар да жиі келеді.
Парапланшылар қажетті жабдықтарын жартастардың үстіндегі радиолокациялық мұнараға көтеріп, сол жерден ұшуды бастайды. Олар жағалау бойымен қалықтап, Жерорта теңізінің панорамалық көрінісін тамашалайды. Ұшу соңында төмендегі жағажайға қонады.
Парапланшы Кадерим Бояджи бұл жердің әсіресе күн батар кезде ерекше көрінетінін айтты. Оның сөзінше, ұшу кезінде пилоттарға теңіз бен табиғаттың әсем көрінісі ашылады.
«Мұнда ұзақ уақыт ауада қалықтауға болады. Жайқалған жасыл табиғатты, көк теңізді бақылап, бұлттардың үстіңізден өтіп, тіпті ылғалын сезіну ерекше әсер сыйлайды», — деді ол.
Бояджи парапланмен ұшуды ұнататындарды жартастарға келуге шақырып, нысанды туристік бағыт ретінде дамытуға үміт білдірді. Оның айтуынша, болашақта мұнда туристерге де парапланмен ұшу мүмкіндігін ұсынуға болады.
Тағы бір парапланшы Юсуф Чошкун Харбиш жартастарының ұшу үшін қолайлы әрі ерекше орын екенін атап өтті. Оның сөзінше, мұндағы табиғи рельеф пен көрініс ұшуды одан сайын әсерлі етеді.
Жартастардың астындағы шексіз теңіз бен көкжиекке дейін созылған ұзын Харбиш жағажайы парапланшылар үшін ерекше көрініс қалыптастырады. Чошкун күн батқан кездегі ұшудың әсері ерекше болғанын айтып, бұл орынды енді өз бағытына тұрақты түрде қосатынын жеткізді.
