Алматы облысының тауларында туристер тау мұздығынан адам денесін тауып, бұл туралы құтқарушыларға хабарлады. Кейін ҚР Төтенше жағдайлар министрлігінің құтқарушылары мәйітті таудан эвакуациялап, полицияға тапсырды. Бірнеше күннен кейін оның 19 жыл бұрын жоғалып кеткен туристке тиесілі екені анықталды, деп хабарлайды SteppeNews.kz.
Туристер мұздықтан адам денесін тапты
Оқиға 16 тамызда болды. Екі апта бойы Алматы облысының тауларында жорықта жүрген Беларусьтен келген туристер Северцов мұздығының маңынан адам денесін байқап, бұл туралы тиісті қызметтерге хабарлады.
Туристер координаттарды, фото және бейнематериалдарды 109 қызметіне жолдаған. Олардың айтуынша, бұған дейін де аталған аумақта адам денесі жатқанын көрген туристік топтар болған. Мәселен, 2025 жылғы маршруттарды дайындау барысында Ресейден келген туристердің есептерінде мұздық маңынан адам денесі табылғаны туралы ақпарат болған.
Беларусьтен келген туристер де сол жерде Санкт-Петербургтен келген үш туристік топпен кездескен. Олардың айтуынша, топ мүшелері рюкзактан құжаттарды алып, оларды құтқару қызметіне тапсыруды жоспарлаған. Осыдан кейін мәйітті таудан эвакуациялау үшін тиісті жұмыстар басталды.
Құтқарушылар мәйітті таудан эвакуациялады
Алматы облысының Талғар ауданындағы Северцов мұздығы маңында адам денесі шамамен 3400 метр биіктіктен табылған. Оқиға орнына ҚР Төтенше жағдайлар министрлігінің құтқарушылары барып, мәйітті таудың қолжетімділігі қиын учаскесінен эвакуациялады.
Жұмысқа «Қазавиақұтқару» АҚ-ның тікұшағы жұмылдырылды.Эвакуациядан кейін мәйіт Алматы облысының жедел-тергеу тобының қызметкерлеріне тапсырылды. Мамандардың алдында қаза тапқан адамның жеке басын анықтау және оқиғаның мән-жайын анықтау міндеті тұрды.
Қаза тапқан туристің кім екені анықталды
Көп ұзамай қаза тапқан адамның туыстары байланысқа шықты. Мәйіттің 19 жыл бұрын тауда жоғалып кеткен ер адамға тиесілі екені анықталды.
Оның қызы әлеуметтік желідегі парақшасында әкесінің денесі табылғанын айтып, Беларусьтен келген туристерге алғысын білдірді. Әйелдің айтуынша, бір күні таңертең құрбысы оған туристер жариялаған суретті жіберген. Фотодағы рюкзак оған таныс болып көрінген.
Ол рюкзактың әкесіне тиесілі екенін ескі кеңестік станокты рюкзактан бірден таныған.
«Мен қарап, бұл шынымен әкемнің рюкзагы екенін түсіндім. Себебі ол ескі кеңестік станокты рюкзак болатын. Құтқарушылар тергеушінің нөмірін берді. Біз сөйлесіп, мен әкемнің сақталған барлық құжаттары мен суреттерін, соның ішінде рюкзакпен түскен фотоларын жібердім», — деді ол.
Кейін тергеуші әйелге рюкзактың ішінен әкесінің атына берілген куәлік табылғанын хабарлаған. Осылайша, 19 жыл бойы белгісіз болған туристің тағдыры анықталды.
Қаза тапқан адамның жеке басын анықтауға туристер түсірген фото мен бейнематериалдар, рюкзактағы құжаттар және марқұмның туыстары ұсынған архивтік суреттер көмектесті.
ТЖМ туристерге ескерту жасады
ҚР Төтенше жағдайлар министрлігі таулы аймақтарға жорыққа шығар алдында маршрутты алдын ала зерттеуге кеңес береді.
Сондай-ақ туристерге ауа райының жағдайын ескеріп, өздерінің физикалық мүмкіндігі мен дайындық деңгейін объективті бағалау ұсынылады.
Жоспарланған маршрут пен қайту уақытын жақындарына алдын ала хабарлау қажет. Сонымен қатар өзімен бірге қуатталған ұялы телефонды, байланыс құралдарын және қажетті жабдықтарды алып жүрген жөн. Төтенше жағдай туындаған кезде 112 нөміріне дереу хабарласу қажет.