Алматы Қытай нарығында Орталық Азиядағы жетекші туристік бағыттардың бірі ретіндегі позициясын нығайтып келеді. Visit Almaty, Trip.com Group және Air Astana бірлесіп өткізген туристік науқан қаланы Қытай нарығында ілгерілетуге бағытталған ауқымды жобалардың біріне айналды деп хабарлайды SteppeNews.kz, Алматы қаласы әкімдігінің баспасөз қызметіне сілтеме жасап.
Алматы қаласының Туризм басқармасының мәліметінше, науқан 75,3 миллионнан астам пайдаланушыны қамтып, жоспарланған тиімділік көрсеткішінен 107%-ға жоғары нәтиже көрсеткен.
Науқанның екі айында Ctrip платформасы арқылы Air Astana әуе билеттерінің сатылымы өткен жылдың сәйкес кезеңімен салыстырғанда 20 есеге артқан. Бұл Қытай мен Алматы арасындағы тікелей әуе қатынасына сұраныстың айтарлықтай өскенін көрсетеді.
Науқан аясында Қытайдың ірі цифрлық платформалары, Trip.com мобильді сервистері, әлеуметтік желілер, тревел-блогерлер және әуе билеттеріне арналған арнайы ұсыныстар бір арнаға біріктірілді.
Сонымен қатар әлеуетті туристерге арналған бірыңғай цифрлық гид әзірленді. Онда Алматының табиғи көрікті жерлері, гастрономиялық мүмкіндіктері, мәдени іс-шаралары және белсенді демалыс түрлері туралы ақпарат қамтылған.
Қытайлық туристердің қызығушылығы артып келеді
Науқан нәтижелерін талдау қазіргі қытайлық саяхатшылардың өз бетінше саяхаттауға, жеке маршруттарға және белсенді демалысқа көбірек қызығатынын көрсетті.
Қытайлық туристер арасында ең көп сұранысқа ие бағыттардың қатарында Шымбұлақ, Көлсай көлдері және Үлкен Алматы көлі бар.
Бұл Алматының туристерді жыл бойы қабылдай алатын бағыт ретіндегі әлеуетін көрсетеді.
Науқанның негізгі аудиториясын 35-49 жас аралығындағы саяхатшылар құрады. Сонымен қатар 25-34 жастағы туристер арасында да өсу әлеуеті жоғары.
Бұл жас санатындағы саяхатшылар белсенді демалысқа, тау туризміне, жаяу бағыттарға және тау шаңғысы инфрақұрылымына ерекше қызығушылық танытады.
Алматыға келетін қытайлық туристердің басым бөлігі қалаға тікелей әуе қатынасы бар Бейжің, Шанхай, Үрімші, Гуанчжоу, Чэнду және Сиань қалаларынан келеді.
Науқан нәтижелері Алматыны халықаралық туристік нарықта одан әрі танытуға, жаңа туристік өнімдерді дамытуға және шетелдік туристер ағынын арттыруға мүмкіндік береді.
Бұл бастамалар қаланың Орталық Азиядағы жетекші туристік орталықтардың бірі ретіндегі мәртебесін нығайтуға ықпал етпек.