Алматыда тәулігіне 350 адам қабылдайтын емханасы бар, 250 орындық жаңа көпбейінді онкологиялық орталықтың құрылысы жоспарланып отыр. Жоба мемлекеттік сараптаманың оң қорытындысын алып, келесі іске асыру кезеңіне өтті. Бұл туралы 2026 жылдың бірінші жартыжылдығының қорытындысына арналған алқа отырысында Алматы қаласы Қоғамдық денсаулық сақтау басқармасының басшысы Марат Пашимов мәлімдеді деп хабарлайды SteppeNews.kz, Алматы қаласының әкімдігіне сілтеме жасап.
Жаңа орталық онкологиялық көмектің толық циклін ұсынатын заманауи медициналық мекемелердің біріне айналмақ. Мұнда пациенттер ерте диагностикадан бастап жоғары технологиялық емдеу мен оңалту қызметтеріне дейінгі барлық медициналық көмекті ала алады.
Орталықтың құрамында 250 орындық тәулік бойғы стационар, химиотерапияға арналған 80 орындық күндізгі стационар, консультациялық-диагностикалық емхана, сәулелік терапия және химиотерапия бөлімшелері, роботтандырылған хирургиямен жабдықталған операциялық блок, жансақтау және қарқынды терапия бөлімдері, сондай-ақ эндоскопиялық және трансфузиологиялық орталықтар жұмыс істейді.
Жоба аясында клиникалық-диагностикалық, молекулалық-генетикалық және патоморфологиялық зертханалар ашылып, онкологиялық ауруларды ерте анықтауға арналған жоғары дәлдіктегі зерттеулер жүргізіледі. Сонымен қатар цифрлық медициналық архив, ахуалдық орталық және ісікке қарсы дәрілерді автоматтандырылған жүйе арқылы дайындайтын госпитальдық фармация бөлімшесі іске қосылады.
Қалада бұл жобамен қатар денсаулық сақтау саласындағы басқа да инфрақұрылымдық жұмыстар жалғасуда. Қазір 10 медициналық нысанның құрылысы жүргізілсе, тағы 12 нысан бойынша жобалық-сметалық құжаттама әзірленіп жатыр. Ал олардың құрылысын 2027 жылы бастау жоспарланған.