15 шілде күні Бейжіңде Қытай Халық Республикасы Төрағасының орынбасары Хань Чжэн Жаңа Зеландияның бұрынғы премьер-министрі Джон Кимен кездесті деп хабарлайды SteppeNews.kz, Синьхуа ақпарат агенттігіне сілтеме жасап.
Кездесу барысында Хань Чжэн Джон Кидің Қытай мен Жаңа Зеландия арасындағы қарым-қатынасты дамытуға ұзақ жылдар бойы қосқан үлесін жоғары бағалайтынын айтты. Оның сөзінше, бүгінде Қытай мен Жаңа Зеландия арасындағы жан-жақты стратегиялық әріптестік екінші онжылдығына қадам басты және екіжақты ынтымақтастықты дамыту үшін жаңа мүмкіндіктер ашылып отыр.
Хань Чжэннің айтуынша, Қытай екі ел басшылары қол жеткізген маңызды келісімдерді жүзеге асыруға, сондай-ақ түрлі салалардағы байланыс пен ынтымақтастықты кеңейтіп, тереңдетуге дайын. Бұл өз кезегінде екі мемлекет арасындағы қарым-қатынастың тұрақты дамуына ықпал етеді.
Сонымен қатар ол Қытайдың дамуы әлемге оң серпін мен тұрақтылық әкелетінін атап өтіп, Қытай Халық Республикасы Тынық мұхиты өңірінде бейбітшілік, тұрақтылық, даму және өркендеуді ілгерілету бағытындағы күш-жігерін жалғастыратынын жеткізді.
Өз кезегінде Джон Ки Жаңа Зеландия Қытайды әрдайым дос мемлекет ретінде қабылдайтынын айтты. Ол тараптардың сауда, инвестиция және ауыл шаруашылығы салаларындағы ынтымақтастықты одан әрі нығайтып, өңірлік және жаһандық сын-қатерлерге диалог пен өзара іс-қимыл арқылы бірлесіп жауап береді деген сенім білдірді.
Сондай-ақ Джон Ки алдағы уақытта да Қытай мен Жаңа Зеландия арасындағы екіжақты қатынастарды дамытуға өз үлесін қоса беруге дайын екенін мәлімдеді.