Астанада Перизат Қайратқа қатысты сот жарыссөзінде жаңа деректер жарияланды, деп хабарлайды SteppeNews тілшісі baq.kz сайтына сілтеме жасап.
Прокурордың айтуынша, 2024 жылғы 23 сәуір мен 4 мамыр аралығында су тасқынынан зардап шеккендерге көмек ретінде жиналған қаражат жеке кәсіпкерлердің есепшоттарына аударылып, кейін қолма-қол ақшаға айналдырылып, тікелей Перизат Қайратқа жеткізілген.
Іс материалдарында 22 сәуір күні Перизат Қайрат банк тарапынан қойылған бұғаттауларды айналып өту үшін банктерге ұжымдық түрде өтініш жолдауды өзі бастағаны көрсетілген. Кейінірек оның телефонынан Kaspi Bank қызметкерімен хат алмасу табылған. Айыптау тарапының айтуынша, Перизат Қайрат бұл қызметкерге қысым көрсетіп, қызметін тоқтатқан әрі күмәнді операциялары бар екі жеке кәсіпкердің шоттарын дереу бұғаттан шығаруды талап еткен.
Еске салсақ, қылмыстық іс бойынша күдікті ретінде екі адам, яғни Перизат Қайрат пен оның анасы танылып отыр. 2025 жылдың 4 сәуірінде Перизат Қайраттың анасы Гайни Алашбаева үй қамаққа алынған болатын.
Тергеу барысында анықталғандай, 2021 жылдан 2024 жылға дейін Перизат Қайрат түрлі қайырымдылық акциялары арқылы жалпы сомасы 3,5 миллиард теңге көлемінде қаражат жинап, оны өз пайдасына жаратқан. Мұндай қаражаттар негізінен балаларға, су тасқынынан зардап шеккендерге және Палестина халқына көмек көрсету үшін жиналған деп көрсетілген.
Алайда, тергеу барысында бұл қаражаттардың көп бөлігі оның жеке қажеттіліктеріне, соның ішінде сәнді киімдер, әшекейлер, көліктер мен жылжымайтын мүлік сатып алуға жұмсалғаны анықталды.
Сонымен қатар, ол осы қаражаттарды заңдастыру үшін жалған келісімшарттар жасап, жеке кәсіпкерлермен келісімдер жасаған.
Бұған дейін қайырымдылық қорының құрылтайшысы күдікке ілінгенін, Перизат Қайрат деген кім екені туралы, оның тағы бір заңсыз әрекеті анықталғанын жазған болатынбыз.
Сондай-ақ, Перизат Қайрат «фактілермен қорғанамын» деп өзіне тағылған айыптарды мойындамады. Перизат Қайрат миллиардтаған ақшаны қалай жұмсағаны да белгілі болды.
Asar-Ume Перизат Қайраттың қорына 200 млн теңге аударған, бірақ есебін алмаған.
Бұған дейінгі сот отырыстарында зардап шеккендердің қатарында қайырымдылық қорларының өкілдері, кәсіпкерлер, педагогтер мен жұмыссыз азаматтар бар екені белгілі болды. Тергеу мәліметінше, «BizBirgemiz Qazaqstan 2030» қорына азаматтар өз еркімен 30 мыңнан 200 миллион теңгеге дейін қаражат аударған. Олардың ішінде Kaspi Bank тарапынан аударылған 620 миллион теңге де бар.
Астанада өткен бүгінгі сот отырысында прокурор садақадан сән-салтанатқа өткен Перизат Қайраттың әрекетін атап өтті. Сот процесінде мемлекеттік айыптаушы Перизат Қайратқа 10 жыл, анасы Алашбаеваға 8 жыл түрме жазасын сұрады.