Қытайдың Шыңжаң-Ұйғыр автономиялық ауданындағы Турфан қаласында жүзім шаруашылығы жаңа технологияларға көшіп жатыр. Мұнда жеміс жинайтын роботтар сынақтан өтіп, жүзім өндірісін басқаруға арналған цифрлық платформа іске қосылды, деп хабарлайды SteppeNews.kz.
China News Service — тің хабарлауынша 23 тамызда Турфанда жүзім шаруашылығын цифрландыруға арналған алғашқы конференция және Жібек жолы жүзімінің 32-фестивалі өтті. Шара барысында өңірдің дәстүрлі ауыл шаруашылығы біртіндеп «цифрлық және интеллектуалды» жүйеге көшіп жатқаны айтылды.
Роботтар жүзімді адамнан 6-10 есе жылдам жинайды
Көрмеде Гонконгтың Mainun Robotics технологиялық компаниясы жеміс жинайтын роботын таныстырды.
Компания өкілінің айтуынша, қазірдің өзінде екі робот Турфан жүзімдіктерінде жұмыс істеп жатыр. Олардың жүзім жинау тиімділігі адам еңбегімен салыстырғанда 6-10 есе жоғары.
Бұл технология әсіресе жүзім шаруашылығындағы еңбек шығынын азайтып, өнім жинау процесін автоматтандыруға мүмкіндік береді.
Турфан — Қытайдағы ең ірі жүзім өңірлерінің бірі
Турфан Қытайда жүзім өсіру дәстүрі ерте қалыптасқан аймақтардың бірі саналады.
Қазір мұндағы жүзім алқаптарының жалпы аумағы 42 мың гектарға жетеді. Бұл — Қытайдағы үздіксіз орналасқан жүзімдіктері ең ірі өңір. Ал мейіз өндірісі елдегі жалпы көлемнің шамамен 90%-ын құрайды.
Турфан жүзімі бүгінде Қытай нарығымен шектелмейді. Өнімдері әлемнің 40-тан астам елі мен аймағына экспортталады.
Өңірде асханалық жүзімнен бөлек, мейіз, шарап және жүзім жапырағынан жасалған өнімдер өндіріледі. Соңғысының өзі 20-дан астам ел мен аймаққа экспортталады. 2025 жылы жүзім жапырағы өнімдерінің өндіріс көлемі 13 мың тоннадан асқан.
Жүзім шаруашылығының «цифрлық миы» іске қосылды
23 тамызда Турфанда жүзім саласына арналған жаңа цифрлық платформа да жұмысын бастады.
«Турфанның цифрлық және интеллектуалды жүзім шаруашылығының миы» деп аталатын онлайн жүйе нарықтағы сұраныс пен ұсыныс, өнім өсіру, өңдеу, ғылыми зерттеулер мен технологиялық инновациялар туралы ақпаратты бір жерге жинақтайды.
Платформада жүзім өнімдерін өңдейтін 130-дан астам кәсіпорын туралы мәлімет бар. Сонымен қатар жүзімнің 550 жоғары сапалы генетикалық ресурсы арнайы базаға енгізілген.
Жиналған деректер шаруалар мен кәсіпкерлерге өндіріс көлемін жоспарлауға, нарықты бағалауға және технологиялық шешімдер қабылдауға көмектеседі.
Дәстүрлі шаруашылықтан технологиялық өндіріске
Турфандағы өзгеріс бір ғана роботпен шектелмейді. Жүзім өсіру, өнім жинау, өңдеу және сату кезеңдері біртіндеп цифрлық жүйеге біріктіріліп жатыр.
Бір кездері Жібек жолының бойындағы жүзімімен танылған Турфан бүгінде ауыл шаруашылығына жаңа технологияларды енгізу арқылы осы дәстүрлі саланы жаңғыртуға тырысуда.
Роботтардың жүзім жинауы мен өндіріс туралы мәліметтерді бір платформада біріктіру — Қытайдың ауыл шаруашылығында жасанды интеллект пен автоматтандыруды кеңінен қолдануға көшіп жатқанын көрсететін мысалдардың бірі.