Қытайдың Хубэй провинциясынан келген суретші Чэнь Бо Шыңжаң-Ұйғыр автономиялық ауданындағы Шахъяр уезіне барып, пленэрге қатысты. Сапар барысында ол майлы бояумен екі картина салды. Суретшінің айтуынша, туранга ормандары оны тек табиғи сұлулығымен ғана емес, ерекше атмосферасымен де баураған.
Қытайда «Бір белдеу, бір жол» бастамасы аясында «Әлемдегі ең әсем туранга ормандары» атты мәдени жоба басталды. Ол Хубэй провинциясы мен Шахъяр уезі арасындағы мәдени алмасу мен шығармашылық ынтымақтастықты дамытуға бағытталған. Жоба аясында қытайлық және шетелдік суретшілердің пленэрде салған туындыларының бірлескен көрмесі де ұйымдастырылды.
Жобаға қатысқан Чэнь Бо — Хубэй провинциясы өнер институтының майлы кескіндеме шеберханасында қызмет ететін суретші. Оның Шахъярға сапары осы өңірдегі кең байтақ туранга ормандарымен алғаш рет танысуына мүмкіндік берді.
Чэнь Бо майлы бояумен сурет салумен 30 жылдан астам уақыт айналысады. Сонымен қатар ұстаздық қызмет атқарады. Суретшінің айтуынша, бұған дейін Шыңжаң туралы түсінігі шектеулі болған. Ал өңірді өз көзімен көру оған жаңа шығармашылық мүмкіндіктер ашқан.
«Шыңжаңның туранга ормандарын алғаш көргенде, мен ең алдымен олардың сұлулығын емес, өзіндік мінезі мен көңіл күйін сезіндім», — дейді суретші.
Оның сөзінше, пішіні әртүрлі туранга ағаштары шөлді алқапқа ретсіз орналасқан. Мұндай көріністер Қытайдың өзге өңірлеріндегі табиғаттан айтарлықтай ерекшеленеді және суретшінің есінде ерекше әсер қалдырған.
Чэнь Бо суретші көргенін сол күйінде көшіріп салумен шектелмеуі керек деп есептейді. Пленэр кезінде ол қоршаған ортаның ерекшелігін терең сезініп, оның көңіл күйін өз туындылары арқылы жеткізуге тырысқан.
«Адам фотоаппарат емес. Сондықтан сурет салғанда табиғатты жай ғана көшіргенді ұнатпаймын. Қарапайым еліктеудің мәні жоқ», — деп атап өтті ол.
Суретші туындыларында туранга ормандарының асқақтығын, қатал табиғатын және төзімділігін бейнелеуге тырысқан. Оның картиналарында шынайы пейзаждар автордың қиялымен ұштасады.
Шахъярда болған кезінде Чэнь Бо майлы бояумен екі картина салды. Оның біріне Туранга музейінде көрген қайықпен серуендеуге арналған мүсін шабыт берген. Суретші осы бейнені су жағасындағы туранга ағаштары бейнеленген композицияға енгізген. Ал екінші туындысына өңір тарихымен байланысты Қожа Насреддин бейнесін қосқан. Соның нәтижесінде шөлді өлкенің табиғаты өзіндік мәдени сипатқа ие болған.
Пленэр барысында Чэнь Бо түрлі елден келген суретшілермен де танысты. Әсіресе Қазақстаннан келген суретшінің ұлттық әрі өзіндік ерекшелігі бар бейнелерді, соның ішінде кішкентай есек пен домбыраны шығармаларына қосқаны оған ерекше әсер еткен.
«Біздің шығармашылық ұстанымымыз ұқсас: екеуіміз де картиналарымызға өз идеяларымызды қосамыз. Маған мұндай тәсіл өте жақын», — деді қытайлық суретші.
Чэнь Бо үшін бұл сапар жаңа шығармашылық тәжірибемен қатар Хубэй провинциясы мен Шахъяр уезі арасындағы мәдени байланысты нығайтуға үлес қосу мүмкіндігі болды. Оның айтуынша, Хубэй Шахъярға көп жылдан бері қолдау көрсетіп келеді, ал екі өңір арасындағы байланыс мәдени бастамалар арқылы да дамып келеді.
Суретші өз туындылары адамдар арасындағы байланысты нығайтып, Шыңжаң табиғаты мен түрлі ел өкілдерінің шығармашылық алмасуы туралы естелікті сақтауға көмектеседі деп үміттенеді.
Көрме аяқталғаннан кейін Чэнь Боның картиналары Шахъярда қалады. Суретшінің пікірінше, олар жылдар өткен соң да көрермендерге туранга ормандарын және жобаға қатысушыларды біріктірген мәдени байланысты еске салып тұрады.
Чэнь Бо сапардан алған әсерін Хубэй провинциясына алып қайтып, алдағы шығармашылығында пайдалануды жоспарлап отыр. Оның айтуынша, асқақ туранга ағаштары мен шөлдің ерекше атмосферасы алдағы уақытта да туындыларынан көрініс табады.
Келесі материал: Ғалымдар Альцгеймер ауруын қан талдауы арқылы анықтаудың жаңа тәсілін тапты