Қазақстанның Ішкі істер министрлігінде кеңейтілген алқа отырысы өтіп, тоғыз айдың қорытындысы жарияланды. Ведомствоның мәліметінше, жыл басынан бері елдегі қылмыс деңгейі 7% төмендеген.
Негізгі көрсеткіштер
Қылмыс саны 6 мыңға азайған. Кісі өлтіру, қарақшылық, бұзақылық және ұрлық деректері аз тіркелген. Қоғамдық орындар мен көшелердегі құқық бұзушылық төмендеген.
Ішкі істер министрі Ержан Сәденов баяндамасында бірқатар өңірдегі кемшіліктерге тоқталып, жұмысты күшейту және жаңа тәсілдер енгізу қажеттігін айтты.
Жол апаттары мен қауіпсіздік
Ел бойынша тоғыз айда 26 мыңнан астам жол-көлік оқиғасы тіркелген.
Қабылданған шаралардың арқасында жолдарда көз жұмғандар саны азайғанымен, министр әр көрсеткіштің артында адам тағдыры тұрғанын атап өтті.
«Патрульдеуді күшейтіп, трассаларда полиция нарядтарын көбейту және цифрлық бақылау жүйесін енгізу қажет», – деді Ержан Сәденов.
