Атырау тұрғындары мен қонақтарына 1 қараша күні ауа сапасының нашарлауы мүмкін екені жөнінде ескерту жасалды. Бұл туралы «Қазгидромет» мәлім етті.
Түнде ауа сапасы төмендейді
Мамандардың айтуынша, 1 қараша түнінде Атырау қаласында қолайсыз метеорологиялық жағдайлар күтіледі. Мұндай жағдайда атмосфералық ауаның төменгі қабатында зиянды заттар жиналып, олардың таралуы қиындайды.
Қолайсыз метеожағдай деген не?
Қолайсыз метеорологиялық жағдайлар — әлсіз жел, тұман немесе ауа температурасының инверсиясы сияқты қысқа мерзімді құбылыстардың жиынтығы. Бұл факторлар ауаның ластану деңгейінің көтерілуіне және халық денсаулығына кері әсер етуіне себеп болады.
Сақтық шаралары
Синоптиктер қала тұрғындарына ашық ауада ұзақ уақыт болмауға, әсіресе көлік көп жүретін көшелер мен өндіріс маңында жүруден бас тартуға кеңес береді.
Созылмалы өкпе, жүрек-қан тамыр және аллергиялық аурулары бар адамдарға далаға шыққанда қажетті дәрі-дәрмектерін өзімен бірге ұстау ұсынылады.