STEPPENEWS.KZ: Астана мен Алматы көшелерінде алғашқы жүргізушісіз таксилер 2026 жылдың екінші тоқсанында пайда болады. Жоба пилоттық режимде іске қосылып, қалалық инфрақұрылымға жаңа технологияларды енгізудің бір бөлігіне айналады.
Бастапқы кезеңде көліктер алдын ала белгіленген бағыттар бойынша қозғалып, операторлардың тұрақты бақылауында болады. Рөлде жүргізуші болмағанымен, мамандар жүйенің жұмысын қадағалап, қажет жағдайда араласа алады.
Жалпы жолға шықпас бұрын технологиялар жабық сынақ алаңдарында тексеруден өтеді. Сонымен қатар қалаларда инфрақұрылым дайындалып жатыр: жол таңбалары жаңартылып, навигация жүйелері реттеліп, жолаушыларды отырғызу мен түсіруге арналған арнайы аймақтар жасалуда.
Алғашқы кезеңде жобаға бірнеше ондаған көлік тарту жоспарланған. Билік өкілдері бұл бастаманы тәжірибелік жоба ретінде қарастырып, жүргізушісіз көліктің қауіпсіздігі мен тиімділігін нақты қала жағдайында бағалауды көздейді.
Айта кетейік, Қазақстан бұл технологияны басқа елдерде ішінара сыналған кезеңде енгізуді қолға алып отыр. Мысалы, Ресейде жүргізушісіз жүк көліктері бірнеше жылдан бері тас жолдарда қатынап жүрсе, Беларусь елінде карьерлік самосвалдар белсенді түрде сынақтан өтуде.
Жалпы, жүргізушісіз көліктерді енгізу цифрлық экономиканы дамытуға серпін беріп, алдағы жылдары қалалық көлік жүйесіне елеулі өзгеріс әкелуі мүмкін.
