Еліміздің жоғары оқу орындары мен шетелдік бейіндік академияларда қазіргі уақытта 200-ден астам болашақ әскери дәрігер білім алуда. Алдағы 2027 жылы Қарулы күштердің әскери-медициналық бөлімшелері бакалавриат, интернатура және резидентура бағдарламаларын тәмамдаған 40-қа жуық жас маманмен толықтырылмақ, деп хабарлайды SteppeNews.kz.
Отандық оқу орындары және қыздардың белсенділігі
Болашақ әскери медицина кадрларының басым бөлігі Әуе қорғанысы күштерінің әскери институтында даярлануда. Бүгінде мұнда 150-ден астам курсант әскери істі меңгеріп жатса, олардың арасында 80-нен астам қыздардың бар екені ерекше назар аударртады. Болашақ әскери дәрігерлер теориялық және практикалық медициналық пәндерді Марат Оспанов атындағы Батыс Қазақстан медицина университетінің базасында оқиды. Мемлекет тарапынан барлық курсанттар толық әлеуметтік және материалдық қолдаумен қамтамасыз етілген.
Халықаралық ынтымақтастық пен шетелдік білім беру
Отандық кадрлар даярлаумен қатар, 50-ден астам қазақстандық курсант Түркия, Армения, Қытай және Ресейдің жетекші медициналық жоғары оқу орындарында білім алуын жалғастыруда. Халықаралық әріптестік әскери медицинаның әлемдік озық тәжірибелерін игеруге жол ашады.
Даярлықтың маңызды бағыттарының бірі – мақсатты білім беру гранттары арқылы сұранысқа ие тар бейінді мамандарды оқыту. Қорғаныс министрлігінің тапсырысы бойынша С.Д. Асфендияров атындағы Қазақ ұлттық медицина университеті мен Астана медицина университетінің резидентурасында мамандар оқытылуда.
Бұл бағдарлама аясында жас дәрігерлер келесі мамандықтар бойынша шыңдалады:
- Хирургия;
- Анестезиология және реаниматология;
- Терапия;
- Рентгенология;
- Клиникалық-зертханалық диагностика.
«Әскери-медициналық мекемелердің қажеттілігін қамтамасыз ету үшін жас мамандарды тарту бағдарламасы осымен екінші жыл қатарынан жүзеге асырылып келеді. Қазіргі уақытта 16 адам оқып жатыр, олар оқуын аяқтаған соң өз бөлімшелерінде қызметін бастайды», — деді ҚР Қарулы күштері Бас әскери-медициналық басқармасы бастығының орынбасары, полковник Берік Ілиясов.
Резидентурада кадрлар даярлау Қорғаныс және Денсаулық сақтау министрліктерінің өзара ынтымақтастығы мен бірлескен қаржыландыруы арқылы жүзеге асырылуда. Қарулы күштердің қажеттіліктерін ескере отырып, отандық және шетелдік жетекші медициналық ЖОО-лармен әріптестік алдағы уақытта да жалғасын таппақ.
Келесі материал: Ашхабадта түрікмен-қытай «Лу Бань шеберханасында» жаңа оқу жылы ашылды