SteppeNews.kz: Бейжің қаласында Халықаралық автомобиль тасымалдары жөніндегі Қазақстан-Қытай бірлескен комитетінің отырысы өтті. Маңызды шараға қатысқан қазақстандық делегацияны Қазақстан Республикасы Көлік министрлігінің Автомобиль көлігі және көліктік бақылау комитетінің төрағасы бастап барды. Сонымен қатар, делегация құрамында ҚР Қаржы министрлігі Мемлекеттік кірістер комитеті мен «ҚазАвтоЖол» ұлттық компаниясы акционерлік қоғамының өкілдері де болды.
Отырыс барысында екі елдің өкілдері халықаралық автомобиль тасымалын дамытуға қатысты ең өзекті мәселелерді егжей-тегжейлі талқылады. Атап айтқанда, рұқсат беру жүйесін заман талабына сай жетілдіру, шекара маңындағы инфрақұрылымдарды өркендету және жолаушылар тасымалы бағыттарының желісін барынша кеңейту мәселелері жан-жақты қаралды.
Кездесудің басты қорытындысы бойынша, қос тарап ағымдағы жылдың соңына дейін шетелдік рұқсат бланкілерін сандық шектеусіз беру форматына толықтай көшу туралы маңызды келісімге келді. Оған қоса, қазақстандық және қытайлық тараптар «Нұр Жолы» өткізу пунктінің жұмыс өнімділігі мен өткізу қабілетін одан әрі арттыру мәселелерін де назардан тыс қалдырмай, бірлесе талқылады.
Бұдан бөлек, биылғы жылдың бірінші жартыжылдығының соңына дейін халықаралық WeChat Pay төлем сервисі арқылы еліміздегі ақылы автомобиль жолдарында жол жүру ақысын төлеу функционалын енгізу жоспарланып отыр. Кездесу соңында қос мемлекеттің өкілдері екіжақты ынтымақтастықты одан әрі нығайтудың маңыздылығын ерекше атап өтіп, халықаралық автомобиль тасымалы саласындағы тығыз өзара іс-қимылды жалғастыруға дайын екендіктерін білдірді.