Қазақстанда 2026 жылдан бастап бизнеске салынатын салық саны 20%-ға қысқарады. Бұл туралы Ұлттық экономика бірінші вице-министрі Азамат Әмрин Салық кодексі нормаларын түсіндіруге арналған дөңгелек үстелде айтты, Қаржы министрлігіне сілтеме жасап.
2026 жылдың 1 қаңтарынан бастап Қазақстан Республикасының жаңартылған Салық кодексі күшіне енеді. Әмриннің айтуынша, құжат салықтық әкімшілендіруді кеңінен жеңілдетуді көздейді:
- есептілік көлемі 30%-ға,
- салық саны 20%-ға қысқарады.
«Жеңілдіктер мен алымдар оңтайландырылып, бірыңғай жер салығы жойылмақ. Төлемдердің жекелеген түрлері бойынша мөлшерлеме саны қысқартылады», — деді Ұлттық экономика бірінші вице-министрі.
Өзгерістер корпоративтік және жеке табыс салығынан бастап, инвестицияны ынталандыруға және салық жүктемесін қайта бөлуге дейінгі барлық негізгі бағыттарды қамтиды.
Азамат Әмрин арнайы салық режимі оңтайландырылатынын, яғни үшеуі қалатынын айтты:
- өзін-өзі жұмыспен қамтығандар үшін,
- жеңілдетілген декларация негізінде,
- фермерлік шаруашылықтар үшін.
Өзін-өзі жұмыспен қамтығандар мобильдік қосымша арқылы салықты есептеп, төлей алады.
Әмрин 16 қазанда «НҚА ашу» порталында талқылау аяқталған тыйым салу қызметінің тізбесіне жеке тоқталды.
«Біз бұл мәселені бірнеше ай бойы егжей-тегжейлі қарастырдық. Жаңартылған тізімде қолданыстағы заңнамаға ұқсас 44 позиция қалады — тау-кен және қаржы саласы, акцизделетін, алкоголь өнімін, қару-жарақты өндіру және өткізу және басқалар. Жақында құжат Үкіметтің қаулысымен бекітіліп, министрліктің ресми сайтында жарияланады», — Әмрин.
Қаржы вице-министрі Ержан Біржанов 1,9 миллионға жуық салық төлеуші арнаулы салық режимі шеңберінде жұмыс істеу мүмкіндігін сақтап қалатынын атап өтті.
«Бұған дейін кәсіпкерлер жалпы режимге көшуден қорқатын. Енді бұл мәселе шешілді. Арнайы режимге қатысушылар арасында өзара есеп айырысу кезінде шектеулер болмайды», — деп атап өтті ол.
Оның айтуынша, салықтық әкімшілендіру айтарлықтай жеңілдетілген: салық төлеушілерді тәуекел дәрежесі бойынша санаттау жойылады. Ал мемлекеттік кірістер органдарының назары заң бұзушылықтың алдын алуға бағытталмақ.
Салық есептілігінің нысандары 30%-ға қысқартылды. Мерзімінде ұсынылмаған декларация нөлдік көрсеткішпен берілген болып есептеледі. Бұл ретте кәсіпкер деректерді түзету құқығын сақтайды.
«Салықтық әкімшілендіру рәсімдері және берешекті мәжбүрлеп өндіріп алу тәртібі қайта қаралды. Әлеуметтік төлемдер үшін өндіріп алу шегі енгізілді. Ол 6 АЕК-тен жоғары. Микро- және шағын бизнес үшін қосымша шаралар қарастырылған: негізгі қарызды өтеу кезінде өсімпұлдар мен айыппұлдарды есептен шығару, таратуды жеңілдету және бизнес-қоғамдастықпен талқыланатын басқа да бастамалар бар», — деді Ержан Біржанов.
