STEPPENEWS.KZ: Өнеркәсіп және құрылыс министрі Ерсайын Нағаспаев Қазақстанда шығарылатын автомобильдер бағасының төмендейтінін мәлімдеді. Үкіметте өткен брифингте ведомство басшысы өндіріс көлемін арттыру арқылы нарықтағы баға саясатын реттеу жоспарларымен бөлісті.
Министрдің келтірген деректеріне сүйенсек, 2025 жылдың қаңтарында автокөліктердің жалпы құны 5,4%-ға өскен. Дегенмен, отандық зауыттардан шыққан машиналар небәрі 1,9%-ға қымбаттап, нарықтағы тұрақтылықты сақтап отыр. Ерсайын Нағаспаев модельдік қатардың кеңеюі бәсекелестікті арттырып, құнның түсуіне тікелей әсер ететінін айтты.
«Жаңа маркалардың шығуымен бағалар біржолата төмендейді. Мұны нақ сеніммен айтамын. Осылайша, қазақстандық автомобильдер өндірісі қытайлық машиналар бағасының арзандауына ықпал етеді деп нық сеніммен айтуға болады», – деді Нағаспаев.
Сонымен қатар, министр отандық өнеркәсіптің әлеуеті сырттан келетін көліктерге тәуелділікті азайтуға мүмкіндік беретінін атап өтті. Қазіргі таңда еліміздегі зауыттар өндіріс қуатын арттырып, тұтынушылар үшін қолжетімді нұсқаларды көбейту бағытында жұмыс істеп жатыр.
