Қазақстанда Республика күніне арналған мерекелік шаралар аясында елдің бірнеше өңірінде жаңа заманауи мектептер ашылды, Оқу-ағарту министрлігіне сілтеме жасап.
Алматыда төрт жаңа мектеп ашылды
Алматы қаласында жаңа форматтағы төрт бірдей мектеп оқушыларды қабылдады. Соның ішінде Медеу ауданында 2 мың орындық №220 білім беру кешені салынды. Зәулім ғимаратта 83 оқу кабинеті, төрт спорт залы, кітапхана, асхана, сондай-ақ оқушылардың шығармашылық және командалық дағдыларын дамытуға арналған коворкинг аймақтары бар.
Өңірлердегі білім беру инфрақұрылымы жаңарды
Жамбыл облысының Қарасу және Қаракемер ауылдарында STEM-лабораториялары, робототехника кабинеттері мен конференц-залдары бар екі жаңа мектеп ашылды.
Маңғыстау облысының Мұнайлы ауданында ұлттық жоба аясында 900 орындық мектеп іске қосылды. Мұнда барлық сыныптар интерактивті тақталармен жабдықталған.
Түркістан облысы Сауран ауданында да жаңа №5 мектеп есігін айқара ашты. Білім ордасында кітапхана, спорт және ойын алаңдары, демалыс және оқу кеңістіктері бар.
Батыс Қазақстан облысының Достық ауылында 1200 оқушыға арналған жаңа мектеп апатты ғимаратты толық алмастырды.
Ақмола облысының орталығы Көкшетауда №10 жаңа мектептің техникалық ашылуы өтті. Бұл жерде зертханалық кабинеттер мен көпфункционалды залдар орналасқан.
Қарағанды облысының Жарық кентінде табиғи-математикалық бағыттағы заманауи кабинеттермен, сондай-ақ жасанды интеллект технологиясы орнатылған 22 интерактивті тақтамен қамтылған мектеп ашылды.
Шығыс Қазақстан облысының Игілік ауылында жергілікті бюджет есебінен салынған мектеп бірінші оқушыларын қабылдады.
232 жаңа білім нысаны салынады
Министрліктің мәліметінше, 2025–2026 оқу жылында ел бойынша барлығы 232 жаңа оқу орны салынуға тиіс.
«Бұл бастама орын тапшылығын азайтуға, білім сапасын жақсартуға және өңірлер арасындағы алшақтықты қысқартып, балаларға қолжетімді білім беруді қамтамасыз етуге бағытталған», – деп мәлімдеді министрлік өкілдері.