STEPPENEWS.KZ: Павлодар облысындағы екі мәйітті екі жыл бойы үйде сақтау фактісі бойынша күдіктілерге қатысты бірден екі бап бойынша қылмыстық іс қозғалды. Полиция үй иесі – қарт әйел мен оның қызының үстінен тергеу амалдарын бастады. Қазіргі уақытта екі күдікті де полиция бөліміне жеткізіліп, қажетті сараптамалардан өту үшін арнайы мекемеге жіберілді.
Облыстық полиция департаментінің мәлімдеуінше, бұл резонанстық іс «Мәйіттерге және жерлеу орындарына зұлымдық жасау» (қорлау) және «Алаяқтық» баптары бойынша қаралуда. Тергеу барысында сот-психологиялық және психиатриялық сараптамалар тағайындалған. Нәтижесінде күдіктілердің іс-әрекетіне құқықтық баға беріліп, тиісті процессуалдық шешім қабылданады. Қазіргі таңда екі әйел де психиатриялық диспансерде емделу үстінде.
Аталған баптар бойынша қарастырылған жаза өте ауыр. Кінәлі деп танылған жағдайда оларға 3 мың АЕК (шамамен 12 975 000 теңге) көлемінде айыппұл салынуы немесе 6 жылға дейін бас бостандығынан айырылуы мүмкін. Алаяқтық бабының қосылуы марқұмдардың зейнетақысы немесе өзге де әлеуметтік төлемдерін заңсыз иемдену ықтималдығымен байланысты болуы ықтимал.
Оқиға кезінде үйде болған 6 жасар немересі де назардан тыс қалмады. Бала ауруханаға жатқызылып, дәрігерлердің бақылауына алынған тұста, туыстары оның анасы мен атасын жер қойнына тапсырды. Қазіргі уақытта бүлдіршін Екібастұздағы «Үміт» балаларды қолдау орталығында тәрбиеленуде. Ол наурыз айынан бастап мектепке дейінгі даярлық сыныбына барып, мамандардың көмегімен қалыпты өмірге бейімделіп жатыр.
